DILI, STLTIMORLESTE.com – Grupu artezenatu 50 husi Munisipiu 12 inklui RAEOA, partisipa iha feira natal tinan 2025.
Lia hirak nee hatoo husi Koordenador ba Programa Hakbiit Ekonomia Feto iha Fundasaun Alola, Mario Barreto ba jornalista STL, Sabadu nee (06/12/2025).
“Ami husi Fundasaun Alola iha programa ida naran ekonomi hakbit feto, ami nian atividades ida nee ami hetan suporta husi SEAK, ho ninia objetivu atu promove grupu feto sira nia produtu lokal hanesan tais neebe mak sira halo ho kor natural, atu nunee bele fo rendimentu ba sira, ajuda sira nian nesesidade uma laran, liu-liu atu hakbit sira nian ekonomia uma laran nian, sira nee hamutuk grupu 50 mai husi Munisipiu 12 inklui RAEOA, maibe Atauro deit mak la mai,”.nia esplika.
Nia dehan, feira ida nee halao durante loron rua, ohin halo abertura too aban, grupu 50 nee baibain sira partisipa iha feira nasional, sira sempre kontaktu Fundasaun Alola organiza sira ba tuir feira nasional, no iha grupu barak sira lori ba too iha feira internasional, produtu ninia presu depende fali ba sira nian kualidade tais no sira nian medidas tais neebe mak sira iha.
“Husi Fundasaun Alola ami nian grupu alvu neebe mak iha ami sempre tui-tuir sira hodi nunee garantia kualidade, ami sempre fo formasaun liu-liu kona-ba natural ho tekniku soru, ami sempre fasilita nafatin sira, hodi nunee ita bele garantia kualidade tais nee, tanba ita nian tais mak sai hanesan patrimoniu Kultura iha TL,” katak nia.
Nia hatutan, grupu 50 nee kada grupu ninia membru nain 15, barak liu mak nain 25, ba atividades feira ba loron rua nee ami hetan montante orsamentu husi SEAK hamutuk US$ 1.250, tanba grupu sira neebe mak ami konvida mai, ami la fasilita transporte ba sira, maibe sira mai deit voluntariamente, tanba kada tinan ami sempre organiza feira ida nee, tinan ida dala rua, ami bolu feira Alola ho feira natal.
Grupu artezenatu hamutuk 50 sei hatudu no faan ba públiku produtu hanesan tais, homan no tioan, boneka, estatua, livru, kaixa, sanan rai, vazu aifunan, sabaun lokal, hahan lokal, kafé, mina nuu virgin, produtu husi plastiku reziklazen no seluk tan.
Jornalista: Jacinta Sequeira
Editor: Xisto Mendonça
