BAUKAU, STLTIMORLESTE.com – Mosu grupu deskonhesidu asaltu negosiante sira iha Suku Uailili, Postu Administrativu Baukau Vila, Munisipiu Baukau.
Vitima Silvania Jelita haktuir, iha loron 13 Marsu tinan nee, hamutuk ho laen kaben inklui ajudante nain 2 ho transporte fuju kor cokolate dezloka husi Baukau Vila ba Suku Gariuai, iha neebe tula sasan nesesidade baziku atu ba faan iha Gariuai, maibe too iha area Suku Uailili pur volta tuku 22:00 kalan, hetan asaltu husi grupu deskonhesidu hodi tuda vidru kareta nian iha parte oin nomos parte odamatan karuk too borus hodi rezulta laen kaben neebe nuudar kondutor hetan kanek iha parte ain tuur parte loos.
“Ami halai neineik iha Uailili nian derrepente hasoru joven nain 6, sira uza helem isin molik, falun oin metin halo aan hanesan ninja tuda hasoru ami kona vidru kareta nia oin retak tiha, odamatan nian nee mak tuda borus fatuk kona katuas oan nia ain kanek,” haktuir Silvania ba STL liu husi telefone, Segunda (17/03/2025).
Nia sublina, hafoin hetan tuda husi grupu deskonhesidu refere, vitima sira kontinua ho kareta halai no too kilometru 1 para besik iha komunidade sira nia uma hela fatin besik Postu Saude Uailili atu kesi metin tali neebe grupu deskonhesidu sira kore neebe deskonfia grupu refere atu naok sasan tula iha kareta laran hanesan foos, sigaru, mina tein, masin, masako no seluk tan.
Hafoin kareta para laen kaben tun husi kareta atu kesi tali no planu kontinua ba hatoo informasaun iha Autoridade Suku Uailili, maibe derrepente mosu tan joven ida falun aan metin kaer fatuk atu tuda, nunee ho hakfodak laen kaben haksoit hikas ba kareta laran hodi hases aan husi area Uailili ba kedas Suku Gariuai.
“Iha dadersan nee mak ami keixa iha Polisia Eskuadra Postu Baukau Vila, maibe polisia mos dehan ami labele halo buat ida, tanba la konhese ema nee, iha tempu kalan sira mos falun aan metin,” informa Silvania.
Negosiante nee sente triste ho asaun refere, tanba durante nee halo deit negosiu no la halo problema ho komunidade sira iha Uailili.
Relasiona ho kazu refere, vitima Silvania husu Autoridade Seguransa Komando Polisia Munisipiu Baukau atu estabele postu seguransa iha Uailili hodi garante seguransa movimentu ema ho transporte ho seguru iha kualker tempu, tanba dala barak ona kazu hanesan nee akontese iha area refere.
Too notisia nee publika, STL seidauk konfirma ho Komadante Komando Polisia Munisipiu Baukau.
(tom)
