BAUKAU, STLTIMORLESTE.com – Grupu kategoria Parokia Santa Terezinha Kelikai hamutuk ho sarani sira kondena atetude sarani inisial SDC hasoru Padre Paroku David Savio, SDB rezulta kamizola nakles.
Liu husi komunikadu imprensa, Porta voz Arnaldo Ximenes Maria haktuir, iha loron 12 Maiu 2025 parte dader sarani SDC prezensa iha kartoriu Parokia Kelikai, objetivu atu trata oan nia sertidaun batizmu, maibe funsionariu sira hatan, naran seidauk labra iha livru asentu, nunee SDC emosaun baku meza no funsionariu sira bolu Padre Paroku, David Savio SDB atu esplika.
Hafoin Padre Paroku too tenta esplika kondisoens neebe kartoriu enfrenta, tanba SDC nia oan naran seidauk labra iha livru asentu, razaun pesoal responsabiliza ba labra enfrenta moras struk liu ona tinan.
Maibe SDC la preokupa rona esplikasaun husi Padre Paroku ho razaun tanba SDC nia oan sarani halo ona fulan 7, maibe naran seidauk tama iha livru asentu Parokia nian, nunee SDC halo agresaun fiziku no rasta kamizola nakles iha Padre nia isin. Hafoin funsionariu sira komunika parte Polisia too fatin hodi neutraliza no lori SDC ba sela Komando Polisia Munisipiu Baukau.
“Bazeia ba akontesimentu nee, ami grupu kategoria hamutuk ho sarani Parokia Kelikai hatoo solidariedade no lamenta tebes agresaun fiziku neebe individua (SDC) halo ba Padre Paroku Kelikai, ami sente triste ho violentu ida nee,” hateten porta voz liu husi komunikadu imprensa neebe realiza iha Kelikai, Domingu (18/05/2025).
Nia sublina, lamenta ho asaun SDC hasoru Padre Paroko Kelikai, tanba SDC halo asaun iha fatin sagradu no santu ba sarani sira.
Aleinde mos asaun SDC daudaun Parokia Kelikai provizoriu taka odamatan kartoriu ba publiku, tanba kestaun seguransa no fo impaktu ba sarani seluk neebe trara dokumentus.
Nunee kondena asaun SDC hasoru Padre Paroku Kelikai neebe hamonu dignidade igreja Katolika iha Timor Leste, tanba eskandaliza publiku hodi seluk defama Paroku Kelikai katak, aumentu folin sertidaun too US$ 30.00 kada pesoal.
“Bazeia ba kazu mensiona iha leten, ami rekomenda ba sarani sira neebe hakarak trata dokumentu ruma iha Parokia mak iha problema ruma, koalia didiak buka solusaun hamutuk, basa violensia la rezolve problema,” Porta voz nee rekomenda.
Sarani Parokia Kelikai, Januário Freitas hateten, atetude neebe SDC hatudu ba Padre Paroku Santa Terezinha Kelikai, sarani tomak la simu, tanba durante tinan naruk ona Kelikai oan la halo asaun krimi ruma hasoru Padre sira, maibe foin primeira vez akontese.
“Ami sarani la simu atetude ida nee, se Amu lori kazu nee ba Tribunal ami apoiu tebes no ami sarani ezije kazu nee tenke kontinua hodi hetan nia solusaun tuir lei neebe vigor iha Timor Leste,” katak Januário Freitas.
Entretantu kazu hasoru Padre David Savio, SDB daudaun iha ona Tribunal Distrital Buakau neebe sei realiza prosesu sumariu iha loron 21 Maiu tinan 2025 parte loraik.
(tom)
