BAUKAU, STLTIMORLESTE.com – Grupu Lia-Luga hahu kuda budu tasi iha tasi area Suku Buruma, Postu Administrativu Baukau Vila, Munisipiu Baukau.
Koordenador Grupu, Adolfo da Silva hateten, grupu Lia-Luga kuda budu tasi hetan apoiu husi kompanhia Laga Salt neebe objetivu, kria kampu trabalhu ba komunidade sira iha Suku refere, neebe sai trabalhador iha atividade kuda budu tasi hodi kontribui ba nesesidade ekonomia familia.
“Ami ba halo negosiasaun ho kompanhia Laga Salt tanba kompanhia nee nia intensaun kria servisu, atu ita halo negosia lori servisu budu tasi nee mai fatin Buruma, atu nunee ita fo ba ita nia ema sira bele servisu,” Adolfo hateten ba jornalista sira,iha Lia-Luga Buruma, Segunda (24/11/2025).
Nia sublina, grupu refere hetan apoiu fini no ekipamentus kuda budu tasi nian husi kompanhia Laga Salt no envolve trabalhador nian 9,neebe nia servisu hanesan kada loron halo manutensaun hamoos ba budu tasi neebe kuda ona.
Nia fundamenta, bainhira budu tasi refere koilheta sei la faan iha merkadu, maibe kompanhia rasik sosa hodi halo produsaun ba produtu SEA MOOS nian iha Timor-Leste.
“Ami kuda nee medida 400 persegi kona-ba folin ninian ami garantia ba kompanhia Laga Salt, tanba ami halo produsaun kompanhia Laga Salt mak sosa,” Adolfo komenta.
Xefe Suku Buruma Liborio dos Santos Freitas apresia no agradese ba kompanhia lokal, neebe apoiu ona komunidade sira hahu envolve iha atividade kuda budu tasi.
“Ho atividade kuda budu tasi nuudar Autoridade haree hanesan alternativa ba komunidade iha Suku Buruma rasik, tanba durante nee komunidade nia rendimentu mai husi deit hortikultura, maibe hortikultura nia merkadu problema, entaun dala barak komunidade preokupadu ho kondisaun ida nee, prezisa iha atividade seluk neebe mak sai hanesan alternativa ba sira hetan rendimentu sustenta sira nia familia,” Liborio katak.
Tuir Xefe Suku Buruma nee katak, bainhira atividade kuda budu tasi refere iha futuru rezultadu diak iha aspetu ekonomia, garante komunidade barak sei involve iha atividade refere, tanba iha merkadu atu oferese produtu budu tasi refere.
“Kona-ba merkadoria tuir informasaun neebe ami hetan husi emprezariu neebe fo ona apoiu ba grupu kiik oan ida nee katak,?iha ona merkadu neebe mak prezisa produtu ida nee,” Liborio komenta.
Enkuantu jerente kompanhia Laga Salt no SEA MOOS TIMOR-LESTE, Tomas Gama hateten, prezensa kompanhia Laga Salt iha Suku apoiu ekipamentus kuda budu tasi ba grupu refere, tanba ezijensia husi Autoridade Suku no komunidade sira, nunee parte kompanhia apoiu ekipamentus ba grupu refere hodi kuda budu tasi.
“Atu informa SEA MOOS kuda budu tasi laos deit agora, maibe antes ona kuaze tinan 2 resin ona ami kuda iha Atauro mai iha Likisa tun ba Peco Atabae nian depois mai iha Maubara mezmu iha kuatidade, maibe rezultadu la masimu entaun lori tan programa nee mai Baukau, maibe sei abranje husi Vemasi tama too Com,” Tomas katak.
Jerente Kompanhia nee argumentu, atividade kuda budu tasi refere iha parte Leste sei abranje hahu husi Munisipiu Baukau area Postu Administrativu Vemasi too Postu Administrativu Com, Munisipiu Lautem, tanba antes nee kuda ona iha tasi Atauro no Likisa, maibe kuatidade seidauk masimu nunee aumenta tan kuda iha parte leste bainhira koilheta iha rezultadu masimu hodi oferese ba kompanhia SEA MOOS hodi tranforma ba produtu kosmetiku no seluk tan.
“Nia sistema ami oferese ekipamentus ba komunidade sira implementa kuda budu tasi, depois budu tasi nia rezultadu ami kompanhia prontu atu sosa, signifika kompanhia iha kedas ona fabrika budu tasi nian,” Tomas komenta.
Nia katak, ekipamentus kuda budu tasi nian, hanesan tasi, redi, lampu no seluk tan parte kompanhia oferese ho gratuito ba komunidade tranbalhadores sira utiliza hodi servisu, no bainhira rezultadu budu tasi iha kuantidade no kualidade parte kompanhia Laga Salt sei sosa produtu refere,hafoin oferese ba kompanhia SEA MOOS hodi halo produsaun ba produtu faan iha merkadu.
Tanba nee Tomas Gama husu komunidade hirak neebe hela besik iha tasi bele halo aprosimasaun ho kompanhia Laga Salt no SEA MOOS, bainhira iha interse hakarak kuda budu tasi, parte kompanhia prontu apoiu ekipamentus no fini, bainhira iha rezultadu kompanhia rasik sei sosa hikas produtu budu tasi refere.
Jornalista: Tomas Reis
Editora: Carme Ximenes
