DILI, STLTIMORLESTE.com – Grupu Linda Hadomi Kultura partisipa iha feira Comunidade dos Países de Língua Portuguesa (CPLP) hodi promove produtu tais, nunee labele haluha kultura Timor nia neebe mak beiala sira husik hela mai ita.
Reprezentante husi Grupu Linda Hadomi Kultura, Adelina Freitas espresa sentimentu kontente hodi partisipa iha feira CPLP ida nee hodi promove ona tais, tanba kuktura nee hahu husi beiala sira nian tempu nunee labele haluha kultura Timor, maibe kaer metin nafatin.
“Hau kontente los wainhira lori produtu nee mai tuir iha feira nee, tanba ita atu tama ona ba iha ASEAN, ema husi nasaun seluk mai vizita ita nia rai, entaun ita mos tenke promove ita nia tais sira neebe mak iha, ema sosa ka la sosa nee laiha kestaun, maibe nafatin promove ami nia produtu hirak nee,” tenik Adelina ba jornalista STL iha CCD, Segunda (21/07/2025).
Nia dehan, Grupu Linda Hadomi Kultura nee harii iha tinan 2008 no iha grupu nee rasik hamutuk ema nain 7, dezafius barak mak grupu nee rasik hasoru, maibe dezafius nee laiha problema ba sira, nafatin halo sira nia atividade hanesan baibain.
Nia dehan, produtu neebe mak faan nee sira halo rasik no hetan apoiu husi Ministeriu Comersiu Industria (MCI) nomos durante nee sira tuir formasaun fulan haat no ema neebe mai fo formasaun nee husi Bali, Jakarta no Surabaia.
“Sira apoiu ami ho transporte deit, depois loron ida sira fo US$ 5, ami husu agradese boot tanba bele aumenta ami nia kapasidade no susesu ba iha ami nia moris,” nia konta.
Nia dehan, fundus neebe mak hetan husi produtu hirak neebe mak sira faan nee selu ba oan sira nia eskola, uza ba nesesidade loron-loron nian no wainhira sasan aira menus uza hodi sosa alat sira hodi hadia fali ba sasan neebe mak aat bo fundus balun sira ba rezerva nia.
Nia dehan, laos foin mak mai partisipa iha feira ida nee, maibe husi munisipiu 13 nee ba hotu ona wainhira ema loke feira hanesan nee, maibe wainhira faan iha Dili ladun hetan rendimentu neebe mak diak.
“Iha Dili ami ladun hetan rendimentu, ema sosa too US$ 500 mai kraik, maibe ami ba iha munisipiu ami hetan rendimentu neebe mak boot tebes, ida nee bele sufisiente ona ba ami nia grupu, “Husi produtu hirak nee ho nia presu neebe mak la hanesan;” tenik nia.
Iha fatin hanesan, Madre Lucia Alves Pereira husi Kongregasaun (CIJ) dehan, aimoruk neebe mak sira faan nee produs rasik no aimoruk refere kura ema barak ona.
Nia konta, aimoruk nee sira aprende husi madre sira husi Indonezia mai Timor iha 1966, no madre nee mai ho nia kursu rasik hodi hanorin joven sira aprende hodi kura aimoruk sira nee no madre nee agora matebian ona.
“Ami tama mai iha kongregasaun ida nee hodi promove nafatin aimoruk sira neebe mak ami faan mak hanesan kista, kanker, raan midar, kolesterol no mos ba moras sira seluk iha hotu laran, nia presu hahu husi US$ 2, balun US$ 5, balun nia presu diferente,” hakotu ona.
(EST 1)
