BAUKAU, STLTIMORLESTE.com – Iha loron 28 Maiu 2025, parte kalan, minoridade sira iha eis merkadu Vila Nova Munisipiu Baukau forma grupu konsege ataka malu liu oras ida hodi impede movimentu komunidade sira.
Padre Parokia Sagrada Coração de Jesus, Vila Nova Baukau, Benediktus Randung haktuir, iha loron 28 Maiu, iha tuku 07:00 kalan, mosu grupu rua involve husi minoridade sira tenta provoka malu no hasai liafuan mal ba malu too hamosu tuda malu.
Tuda malu neebe involve husi minoridade refere la rezulta ema ruma kanek, maibe impede movimentu ema ho transporte no ema lao ain, tanba tuda malu iha estrada publiku kuaze liu oras ida hafoin parte Seguransa Polisia Munisipiu Baukau too fatin hodi neutraliza situasaun liu husi tiru lakremuzeniu dala rua.
“Tuda malu hodi kalan nee rame loos, hau haree labarik kiik oan hotu deit, la estraga sasan, maibe momentu sira tuda malu kareta la lao ba mai, kareta sira paradu hotu kedas, kuaze oras ida, depois rona kilat tarutu dala rua deit, labarik sira mos nonok kedas,” haktuir Padre Benediktus Randung ba jornalista STL iha Vila Nova Baukau, Kinta (29/05/2025).
Asaun tuda malu hodi impede movimentu neebe involve husi minoridade sira nee, Padre Benediktus Randung preokupa, tanba jerasaun kontinuador ba dezenvolvimentu nasaun Timor Leste nian sura ho sira, maibe hahu kria problema iha fatin publiku, nee fo impaktu ba futuru nasaun, tanba jerasaun kontinuador la kria pas no estabilidade, kria konflitu kontribui ba nasaun.
Atu halakon involvimentu minoridade iha krimi sira, inan-aman tenke kontrola makaas ba oan sira, limita oan lao kalan no ransu, tanba ransu bele hamosu impaktu negativu ba futuru.
Nunee akontesimentu Vila Nova neebe involve husi minoridade sira nee, Padre Parokia Sagrada Coração de Jesus deskonfia, suporta husi ema terseira parte, tanba minoridade laiha intensaun atu kria konflitu liu husi tuda malu iha estrada publiku.
“Kazu nee inan aman mak la kontrola ka ema mak dudu sira, hau la fiar hau nia oan sira nee inisiativa ba ida nee, hau la fiar, tanba kreda fo formasaun ba inan aman labarik sira tuir, hodi kalan nee oin seluk. Hau husu mos intelejen sira neebe halo servisu, tanba sa kazu nee mosu, sa tan aktor labarik kiik oan sira karik ema mak provoka, ida nee tenke buka nia hun nee se mak halo ida nee,” Padre nee sujere.
Liga asuntu nee, STL tenta konfirma Komadante Komando Polisia Munisipiu Baukau, Superintendente João Sancho Pires, maibe laiha fatin atu fo komentariu, tanba tuir hela atividades balun iha Dili.
(tom)
