DILI, STLTIMORLESTE.com — Gruta Nain Feto Golgota sai destinadu ba foinsae neebe iha devosaun ba Nain Feto Virgem Maria, hodi hasae sira nia orasaun no lori problema hotu neebe sira hasoru iha moris, atraves nain feto bele hetan solusaun.
Nunee kuaze loron loron joven sira individualmente ka ema grupu ka familia ba iha gruta nain feto golgota hodi hasae sira nia orasaun, nee devosaun neebe joven sira hatudu iha pratika fiar nian, ba Nain Feto Virgem Maria.
Iha vida neebe nakonu ho problema, devosaun ba Nain feto Virgem Maria, nee mak iniku dalan atu bele hasoru problema hirak nee ho kalma, tanba tau fiar tomak ba Maromak no Nai Jesus Kristu liu husi Nain Feto Maria Virgem.
“Hau mai iha nee mak hau bele sente hakmatek, iha uma hanoin barak hau nia laran la hakmatek, hanoin ba servisu be laiha, hanoin ba kompetisasun merkadu servisu neebe makas tebes, hau sente todan, ida nee mak lori hau mai aprezenta ba Nain feto,” dehan Ronaldo Noronha wainhira dada lia ho STL iha areador Gruta Nain Feto Golgota, Tersa (27/1/2026).
Ronaldo dehan, nuudar joven dezempregu besik tinan rua resin, buka servisu ho diploma segundaria, laiha skill, nee susar tebes, buka atu sai deit ajudante badaen mos susar los, tanba atu hetan oportunidade sira hanesan nee tenke iha koneksaun kaa iha familia ruma servisu area nee.
Joven husi Munisipiu Manufahi nee dehan, depois remata eskola sekundaria tun mai Dili, atu tuir kursu lian korea nunee bele hetan oportunidade ba servisu iha Korea, tanba nee mak wainhira nia naran sai iha UNTL nia lakohi kontinua, tanba atu ba tuir deit kursu hodi bele servisu, mas atu tuir deit kursu presiza mos dokumentu lubuk ida, too agora seidauk bele prenxe dokumentu sira nee hodi tuir kursu.
“Hau nia mehi mos atu sai forsa ka polisia mas problema iha hau nia an mak alturas la too, nunee halimar deit uma, labele halo buat ida, nee razaun husi problema fundamental neebe hau hasoru, no hakarak aprezenta mos ba Nain feto,” dehan Ronaldo.
Nia dehan, daudaun nia hela ho nia inam aman enkaregadu iha Dili, hodi hein oportunidade balu atu bele prenxe, mas ho merkadu servisu neebe limitadu, oportunidade atu hetan servisu iha rai laran difisil tebes, nunee mos oportunidade ba servisu iha rai liur.
“Hau iha primu, remata tiha kursu ba Korea, hein too gagal, balu tes liu tiha ba Australia hein samada deit, kleur los too agora seidauk, hau hare iha buat balu falun iha prosesu sira nee, balu kursu la kelur deit ba tiha servisu, baju fali hein too gagal, nee keta ongkos ruma, nee araska, tuir kursu se hare fali ba nee aras kedas,” nia komenta.
Nia fiar katak saida mak nia dehan nee hanesan supozisoens deit laos realidade mak akontese iha pratika haruka trabalador ba servisu iha rai liur, nunee ema kbiit lae nia oan sira bele hetan oportunidade ba servisu iha rai liur. Se lae so ema iha osan mak haruka nia oan sira ba servisu iha rai liur.
Nunee mos Isaura da Costa hatete nia tuir ona kursu lian korea nee kleur ona test liu ona hein ba servisu iha Korea, maibe hein too kansela deit, nunee tenke tuir fali tan, sei tuir test dala ida tan hodi bele hein ba servisu iha Korea.
“Iha tinan hirak liu ba hau tuir kursu korea, test liu tiha, mas hein deit kontratu too kansela deit, iha nee faktu, hau lahatene problema iha saida, nee so parte SEPOFE mak hatene, tanba buat hotu liu husi SEPOFE,” dehan Isaura.
Graduadu UNTL nee dehan, nia nunka hanoin rende atu ba servisu iha rai liur, desde uluk kedas maske hanesan feto nia mehi nee mak tenke ba servisu iha rai liur, hodi bele hadia familia.
“Ita hare maluk joven sira servisu iha rai liur, manda osan mai familia sira hadia moris diak liu, halo uma, sosa kareta, motor, halo bisnis oin oin, hanesan joven hau mos hakarak kontribui ba hau nia rai no hau nia familia, liu liu hadia familia nia moris diak,” dehan Isaura.
Hanesan graduadu Isaura laiha espetativa atu buka servisu iha Timor, tanba salariu kiik, atu hadia moris difisil. Tanba nee mehi boot ninian mak ba servisu iha rai liur.
“Iha Timor hau laiha hanoin atu servisu, hau nia mehi ba servisu iha rai liur,” nia tenik.
(god)
