DILI, STLTIMORLESTE.com – Guarda Prizional preokupa ho Estatutu Guarda Prizional nian, tanba sira halao servisu kleur ona maibe seidauk iha estatutu ida hodi regula sira.
Tuir Diretor Prizaun Gleno, Cristiano Salsinha katak, guarda prizional sei hela ho duvidas kona-ba estatutu sira nian, tanba nee sujere ba oin bele haree oinsa atu buka solusaun ba estatutu nee.
“Dehan halo alterasaun maibe besik tinan ida ona seidauk iha informasaun mai ami, ami guarda prizional hela ho duvidas, ida nee mak sai difikuldade mai ami guarda antiguidade,” dehan Diretor Prizaun Gleno, Cristiano Salsinha ba STL liu husi telefone, Segunda (21/04/2025).
Nia hatutan, sira barak servisu iha tinan 2000 too agora, seidauk iha estatutu ida hodi regula sira, tanba nee fo hanoin ba iha Ministeriu Justisa liu husi Diresaun atu aselera kona-ba alterasaun estatutu nee.
Maibe tuir informasaun katak antes nee haruka ba iha Konselhu Ministru maibe haruka fila fali mai, tanba sei hadia buat balu, no too agora sira seidauk simu informasaun kona-ba ida nee.
Iha fatin ketak, Akademiku UNTL, Sebastiao dos Santos dehan, servisu Guarda Prizional nian importante tebes hodi tau matan ba dadur sira, tanba nee importante duni hodi kria sira nia estatutu ida.
“Guarda sira nia servisu importante hodi tau matan ba dadur sira, servisu neebe sira halao responsabilidade ida, tanba nee kria estatutu ida hodi valoriza mos sira nia servisu,” dehan nia.
(ter)
