LAUTEM, STLTIMORLESTE.com – Com Beach Resort house neebe mak lokaliza iha Suku Com, Munisipiu Lautem, abandonadu kuaze tinan 10 ona, tanba nee afeta ba turista sira atu vizita sitiu turistiku sira iha neeba.
Komunidade Aldeia Vialavaila Suku COM, Olegario da Costa hateten, tuir nia area Com nee area turizmu duni, maibe haree ba fatin balu Abandona tiha.
“Ita haree fatin Com Garden Beach Ressort abandona nee kuaze tinan 10 ona, abandona tiha tanba uluk malae Australia sira investe iha nee, depois halo kontratu ho rai nain iha nee, maibe tempu neeba kuandu malae nee fila tiha entrega ba rai nain, entaun rai nain sira iha konflitu mak abandona tiha fatin nee too agora seidauk rezolve,” dehan Olegario ba jornalista sira iha nia rezidensia Vailovaia, Lautem, Segunda (18/11/2024).
Nia dehan, kona-ba fatin Com Beach Ressort daudaun nee koalia beibeik ona, oinsa para autoridade lokal sira tenke halo asaun ruma atu reativa fali, eko-turizmu ida nee halo aprosimasaun entre família ida ba família seluk, sei sira simu malu nunee bele reativia fila fali.
Tanba fatin balu lao diak hela, maibe husi komunidade iha Suku Com nee rasik presiza iha kontribuisaun diak atu oinsa simu ema sira neebe hakarak atu vizita fatin turista ida nee.
“Depois ita nia servisu hamutuk ho entre ita ho ita no lideransa liu-liu Ministeriu Turizmu Ambiente, ita tenke servisu ho diak para nunee ita melhora ita nia turizmu nee lao ba oin.
Nia mos akresenta katak, sei kompara ho uluk, Com Beach Ressort nee sei diak vizitante sira nee mai barak loos, maibe agora nee la lao ona, entaun vizitante menus ona, dala ruma husi Timoroan mak mai Vizita, maibe hanesan turista husi estranjeiru nee ladun mai ona.
Tanba ida nee nia reprezenta Komunidade Suku Com sujere ba Governu liu husi Ministeriu Turizmu no Ambiente atu haree servisu hamutuk ho autoridade lokal sira iha Lautem atu bele buka dalan hodi rezolve problema nee, nunee ba oin bele reativa fali fatin Com Beach Ressort turistika neebe mak reativa fali.
(mar)
