DILI, STLTIMORLESTE.com – Iha loron Kuarta (23/10/2024), maizumenus tuku 18:26 loraik, mosu dezentendimentu too baku malu entre negosiante faan modo ho ekipa Jestaun Merkadu neebé halo kontrolu iha area Kampung Baru, Suku Komoro nian.
Iha loraik nee, konsumidores ka komunidade barak mak hakat mai iha fatin nee atu sosa modo kalan nian, teki-teki too iha fatin haree negosiante balun haloot daudaun sira nia sasan ho oin tauk, triste no lian nakdedar hodi koalia dehan sira mai ona iha leten. Sira nee mak ekipa jestaun merkadu ka wali kota neebé sempre halo kontrola iha dalan ninin ka trotoar leten sira.
Iha biban nee, negosiante balun la konsege haloot sasan hodi halai ses husi trotoar leten neebé sira uza hodi faan sasan ba, entaun hakarak ka lakohi sira nia sasan hanesan modo hirak neebé iha hela trotoar leten, ekipa jestaun tenke foti hodi tula ba karreta.
Tuir observasaun STL iha loraik nee, ekipa jestaun merkadu mai ho karreta marka Toyota Hilux 2, akompanha mos husi PNTL. Modo neebé ekipa hadau tula ba iha karreta hilux ho numeru plat 05.272 G.
Iha atuasaun nee, negosiante mane ida neebé la konsege haloot ka lori halai nia modo, ekipa jestaun obriga hadau hodi tula ba karreta laran. Tanba nia lasatisfas ho atuasaun nee, negosiante nee baku malu ho ekipa jestaun sira, halo nia maluk negosiante seluk mos mai baku malu ho ekipa jestaun sira neebé atua hela negosiante mane nee, balun mai hakilar, tolok, no lori modo tuda ba ekipa jestaun sira. Haree ba situasaun la kontroladu nee, ekipa PNTL neebé akompanha, membru nain ida hasai pistola tiru ba leten lian dala 3, hodi hapara hikas situasaun neebe mosu iha fatin refere.
(Ekipa STL)
