DILI, STLTIMORLESTE.com – Relasiona ho komemorasaun loron internasional ba feto, mak realiza konferensa Nasional Lider Feto iha Edukasaun, ho tema Haforsa Lideransa Feto ba Futuru Timor Leste”.
“Ohin iha ambitu komemorasaun loron Internasional feto neebe sei iha aban, Ministeriu Edukasaun foti inisiativa halo atividade no selebrasaun ho feto potensial iha area edukasaun, neebe mak iha duzentus duas profesoras no profesores sira hanorin iha Ensinu Baziku sira iha teritoriu tomak,” dehan Ministra Edukasaun, Dulce de Jesus Soares ba jornalista sira iha Timor Plaza, bainhira partisipa iha Konferensa Nasional Lider Feto iha Edukasaun, Sabadu (07/03/2026).
Nia esplika, sira hetan formasaun husi programa ida neebe ME servisu hamutuk ho Governu Australianu liu husi programa ida, fo apoiu no formasaun ba sira, balu sai hanesan diretora ba eskola no balu hanesan Koordenadora ba Bazika Filial sira, balu hanesan profesores baibain, iha mos formasaun espesial ida ba sira hanesan lideransa feto.
Nia dehan, sira komprende tebes oinsa sira nia papel hanesan profesora, oinsa jere sala de aula, oinsa halo avaliasaun, organiza eskola em jeral, tanba durante vizita iha observasaun katak, eskola neebe lidera husi feto ida, normalmente eskola nee oragnizadu liu, kompara ho eskola neebe laos feto maka lidera.
Maske feto potensial sira laos diretora eskola ka koordenadora eskola, maibe sai profesora da turma kuandu iha vizita observa katak, 16 komponentes neebe tuir kurrikulu Ensinu Baziku nian tenke implementa iha sala de aula ida, no sala neebe feto sira mak kaer husi 16 komponente nee maske sira la implementa hotu, maibe balu sira implementa duni.
Nunee fo tan servisu ba sira hanesan feto potensial, ajuda monitoriza literasia no numerasia iha primeiru segundu no terseiru ano, tanba tinan ida nee ME sei halo teste simples ida ba labarik sira kona-ba literasia no mos numerasia ba labarik sira iha primeiru segunu no terseiru ano, pontu importante ida ba iha ME, no sai mos benefisiu ba feto potensial no feto profesora sira atu bele reforsa literasia no numerasia iha Ensinu Baziku.
Iha fatin hanesan, Reprezentante Embaxador Australia iha Timor Leste, Mr Edward Wilkinson dehan, sente kontente hamutuk ho Ministra Edukasaun selebra loron Internasional feto.
“Sente orgulhu tebes mai iha nee ho Ministra Edukasaun selebra loron Internasional feto, ho nia tema kona-ba feto lideransa edukasaun iha Timor Leste, grupu kritiku atu hanorin estudante ba futuru,’ dehan nia.
Nia argumenta, ida nee sai hanesan programa espesial, feto espesial no feto matenek, no importante atu segura hanorin estudante sira atu hatene no buras liu tan.
Tuir observasaun partisipa iha konferensa nee mai husi feto lideransa barak neebe mak envolve aan hanesan edukador iha eskola sira.
(ter)
