DILI, STLTIMORLESTE.com – Asosiasaun HAK halo lansamentu video istoria susesu bee no saneamentu iha Munisipiu Likisa no Manufahi.
Asosiasaun HAK hamutuk ho parseiru halo lansamentu video istoria susesu asegura sustentabilidade bee no saneamentu rurais, no asembleia kultura ho mekanismu auditoria sosial liu husi intrumentu KPK iha Munisipiu Likisa no Manufahi. Video nee nuudar referensia ba instituisaun estadu no nivel nasional, Autoridade Munisipiu no Postu, Konselhu Suku no parte intersadu sira atu prioritiza investimentu no planeamentu no haforsa mekanizmu asembleia kultural iha nivel suku no hodi kontribui ba dezenvolvimentu sustentablidade setor bee no saneamentu ijine.
Iha biban nee, Visi Diretor HAK, Antonino de Lima liu husi diskursu iha salaun FOKUPES, Segunda (11/11/2024) hatete, HAK halo lansamentu video ida nee hanesan prosesu dokumentus ba serbisu parseria neebe halo husi asosiasaun HAK, neebe mak hetan apoiu husi Water Aid Timor Leste hamutuk ho parseiru dezenvolvimentu sira halao ka implementa programa ba assuntu bee mos nia iha Munisipiu Manufahi no Likisa.
“Rezultadu ba istoria susesu saida mak bele aprende husi munisipiu rua nee ba iha munisipiu seluk hanesan Bobonaro Ermera, nomos Baukau, husi dokumentus susesu foti no rona lian husi komunidade, autoridade neebe iha Postu nomos lideransa suku sira ba programa bee moos neebe HAK ho parseiru sira implementa iha Likisa no Manufahi,” katak nia.
Nia hatete, saida mak HAK halo kontribui iha dezenvolvimentu hodi tau matan ba bee moos nee hanesan misaun husi organizasaun nia neebe haree ba asuntu Direitus Humanus, liu-liu direitu sidadaun sira atu asesu ba bee moos, tanba TL mos ratifika konvensaun direitu ekonomi sosial no kultura, no assuntu bee moos nee hola parte direitu, tanba nee mak HAK ho parseiru tau hamutuk forsa atu apoiu sosiedade ou sidadaun sira neebe susar asesu bee moos liu-liu sira neebe mak hela iha area rurais.
Nunee mos Visi Prezidente BTL EP, Zeca Smith agradese ba HAK neebe fo konvite, hodi mai partisipa iha lansamentu bee no saneamentu, lori Ministeriu nia naran nomos BTL EP nia naran fo apresiasaun boot tebes ba Water Aid ho HAK, no parseiru sira neebe durante nee halo servisu ba koordenasaun, lori nia rezultadu no vantajen pozitivu ba iha povu liu-liu iha area rurais.
Nunee mos Country Diretor Water Aid Timor Leste, Justino da Silva hatete, istoria husi video nee husi ema lubuk ida mak fo hanoin liga ho susesu bee no saneamentu.
(eme)
