DILI, STLTIMORLESTE.com – Asosiasaun Hak husu Governu proteje fatin istoriku Tasi-Tolu sai fatin ekolojiku no turizmu relijiozu, laos loke estadiun footbal hodi hamate valor istoriku.
Kestaun nee hatoo husi Visi Diretor HAK, Antonino de limas ba STL iha Farol, Kinta (09/10/2025).
Nia hatete, Hak hanesan mos organizasaun direitus humanus nia, antes nee Governu planu halo konstrusaun pelican paradise sosiedade sivil kontra ho razaun tanba Tasitolu iha tempu UNTAET nia nuudar area protezida, nia hili nuudar area protezida ho baze katak Tasitolu nee ho Lagoa 3 iha neeba ho manu oin oin no aihoris balun iha neeba entau ba iha aspektu ekologiku ambiental nee husu atu proteje.
Nia dehan, Tasitolu presiza proteje karik atu halo atividade ruma nuudar parte ekoligia ho naran saida deit ba assuntu rekreasi nia deit, no segundu fatin nee mos fatin istoriku tanba iha 1989 Papa Joao Paulo II vizita povu iha 12 Outubru iha Tasitolu, no foin lalais tinan kotuk ba Papa Francisco mai misa ho sarani entau fatin nee sai istriko no fatin religiozu nia.
“Husi hau nia hanoin fatin neeba merese, ita konserva sai hanesan parte ekologiku ba turismo istoriku no religioza nia tanba estatua Joao Paulo II nia mos iha laletek nee, ba oin atu hola parte iha neeba, tanba nee mak harii estadiu nee buka fatin no rai seluk, tanba rai estadu nia barak labele harii estadiu iha neeba halakon valor istoriku, katak nia.
Nia afirma, se harii estadiu footbal iha fatin istoriku no fatin relijioza nee bele muda tiha istoria evedensia balun husi istoria nee bele halakon tiha.
No harii estadiu iha neeba hasai habitante sira iha neeba mos sei gasta tan osan ba kompensasaun ho osan barak, tanba nee diak liu sujere ba fatin seluk iha Hera no Metinaro.
Nia hatete, dala barak mos sosiedade balun komplain katak estadu ida nee iha rai boot, igreza mos iha rai boot buat sira hanesan nee presiza hatuur, maibe iha rai ida premeiru mak estadu depois mak instituisaun seluk.
Nunee mos Prezidente Konferensia Episkopal Timorense CET, no Bispo Dioseze Maliana Don Norberto do Amaral mos deklara ba media katak, la konkorda ho politika Governu nia neebe atu harii estadiu footbal iha Tasitolu sei halakon sitiu istoriku tolu neebe importante.
Don Norberto esplika, fatin istoriku tolu iha Tasitolu mak restaura independensia Timor Leste nia no Sua Santidade Joao Paulo II no Sua Santidade Papa Francisco mos vizita hodi halo misa ho sarani Timor Leste pontu tolu nee mak importante sai nuudar sosiedade katolika.
Jornalista: Emerenciana Pinto
Editora: Domingas Gomes
