DILI, STLTIMORLESTE.com – Asosiasaun HAK konsidera deklarasaun husi Deputada CNRT neebe husu Prezidente Republika atu hatoo keixa kona-ba roo Haksolok, ida nee materia tuan no sin ona.
Lia hirak nee hatoo husi Diretor HAK, Feliciano da Costa Aroujo ba STL iha nia knaar fatin Farol, Sesta (24/01/2025).
Nia hatete, kona-ba keixa roo Haksolok nee laos materia foun ida ba politiku nain sira, maibe nee materia tuan no sin ona.
“Hau hanoin ida nee materia neebe tuan, ba ami konsidera nee materia sin tiha ona. Ami rasik hetan informasaun neebe kredivelema balu mos fo hatene ba ami, no konvida mos ami se bele vizita ba iha Portugal, bele ba direitamente fatin prosesa halo roo nee. Klaru katak durante nee ita haree mak nia kulit, maibe ita la haree took roo nee nia laran, nee hanesan movel ida karik ita haree nia, ke isin ita la haree, iha laran nee nia isin iha ka lae, ida nee mak problema,” dehan Diretor HAK nee.
Nia hatutan, kestaun ida husu Prezidente atu hatoo keixa ka la hatoo keixa, nee direitu sidadaun hotu nia, maibe presiza haree, maibe antes nee laos deit membru Governu, maibe deputadu sira mos hatoo kestaun ida nee.
Nia hatutan, keixa nee mak tenke too fin para atu deklara ba iha publiku, liu-liu ba sosiedade sira atu bele komprende US$ 14 milhoens ida ba primeiru, no US$ 14 milhões ida ba segundu, nee inklui mos adisional sira seluk nee iha ezemplu manda ema ba haree no dokumentus sira nee mos uza osan.
“Klaru katak ba ami mak nee, ami konsidera katak diak liu entre orgaun 4 nee koalia ba malu deside liafuan ruma hatete ba sosiedade, se roo la mai ona dehan ba povu ita publika honestu katak roo la mai ona, roo nee besi tua ona, hakarak atu faan fila fali diak liu faan tiha deit ba, ami nia hanoin mak ida ne, duke ita halo fali polemika iha sosiedade ninia laran katak ita sei aranja roo nee mai, nee ba ami lamentavel tebes,” katak nia.
Nia hatutan, vontade Prezidente nia kontinua ba ninia mandatu too tinan 5, se nia mandatu remata maibe nuudar sidadaun nafatin kontinua atu bele alerta ba iha tribunal prosesu, ida nee para bele haree, nunee too fin bele haree se los mak sai hanesan responsavel ba roo refere.
(eme)
