DILI, STLTIMORLESTE.com – Nakait ho Komisaun Anti Korupsaun (KAK) neebe detekta broker iha Notariadau ho Diresaun Nasional Transporte Terestre (DNTT), nunee Asosiasaun Hali ba Dame (HABADA) no Asosiasaun HAK husu KAK foti asaun imediata.
Diretor Ezekutivu Hali ba Dame (HABADA), Abel Amaral haten, ligadu ho broker sira nee, hanesan asosiasaun husu ba Ministeriu Justisa no Ministeriu Transporte no Komunikasaun toma atensaun didiak.
“Ami hanoin ligadu ho sira broker nee, ita husu ba ministeriu relevante sira, liu-liu Ministeriu Justisa no Ministeriu Transporte no Komunikasaun sira tenke tau atensaun didiak, tanba sa mak mosu broker, sei mosu broker nee signifika atendimentu nee ba sira nee ladun masimu, nunee mak hamosu broker iha ministeriu ida nia laran,” hateten Diretor Ezekutivu Hali ba Dame (HABADA), Abel Amaral iha nia knaar fatin Kampung Baru Komoro, Dili, Tersa (18/03/2025).
Tanba nee, Asosiasaun HABADA husu ba ministeriu relevante sira atu tau atensaun didiak ba broker sira, tanba dala ruma atendimentu ba sira ladun diak, nunee husu atu hadia mak atendimentu neebe iha, laos atu kaptura broker neebe iha.
Nia hatutan tan katak, bele halo kapturasaun ba broker sira, maibe la hadia atendimentu entaun bele prejudika hodi hamosu fali broker seluk sei mai, sei hadiak atendimentu nee lalais no fasil, entaun broker nee bele lakon.
Iha sorin seluk, Visi Diretor Asosiasaun HAK, Antonio de Lima hatete, ba broker nee KAK tenke foti asaun, tanba nee hanesan asaun “Operasi Tankap Tanggan” nee iha ona, nunee bele foti asaun imediata.
“Hau hanoin asuntu ida nee tenke ho asaun neebe mak KAK tenke foti, hakarak dehan sira bele kaer ema ruma liu-liu dirijenti ka staf sira neebe mak servisu iha neeba, lo-loos KAK tenke foti ona asaun hanesan “Operasi Tankap Tanggan”, tanba informasaun neebe mak iha laos segredu ona, tanba pratika sira nee mosu tinan barak ona iha Notariadu,” hateten Visi Diretor Asosiasaun HAK, Antonio de Lima.
Visi Diretor HAK nee informa mos katak, vitima sira neebe mak selu dala ruma tanba sira iha situasaun neebe mak obriga sira, tanba sira hakarak presiza dokumentus refere ho lalais, nunee broker sira lalais fo atendimentu ba sira.
Tanba nee husu KAK atu hola medida mos ba broker sira, mezmu broker sira husi Diretor sira ka satf sira mos presiza halo asaun, tanba sira nee komete ona iha rede nia laran, bainhira hakiak sira, sira sei kontinua hetan benefisiu tuir aktu neebe sira halo, tanba nee KAK tenke halo ona operasaun hodi halo kapturasaun.
(EST 3)
