DILI, STLTIMORLESTE.com – Haklot koruptor nia movimentu, Komisaun Anti Korupsaun (KAK) Timor Leste nian formaliza kooperasaun hodi asinatura nota entendimentu ho Komisi Pemberantasan Korupsi ( KPK) Indonezia, iha Jakarta, iha loron 14 fulan Janeiru tinan 2026.
Tuir Komisariu KAK Rui Pereira katak, KAK foin lalais nee desloka ba Jakarta ho delegasaun neebe kompostu husi KAK Komisariu rasik, Adjuntu, Diretor nain tolu ho Diretora ida no Sekretaria Komisariu nian. Akompana husi PNTL no mos Ministeriu Finansas mak ba iha Jakarta hodi asina memorandu ho KPK Indonezia nian.
“Memorandu nee ita asina ligadu ho kooperasaun entre KPK ho KAK Timor Leste, tanba KAK mos sai ona membru ASEAN ba dala sanulu resin ida (11), entaun ita presiza halo kooperasaun ho KPK atu iha kazu krime korupsaun neebe liga ho rikusoin, ita mos bele husu tulun sira,” dehan Komisariu KAK, Rui Pereira ba jornalista sira iha Farol, Kuarta (21/01/2026).
Nia hatutan, se ema Timor oan sira mak loke sira nia konta bankaria iha Indonezia, sosa rai no uma iha Indonezia, se sira halo krime ruma iha Timor ita nia autoridade la hakat liu nasaun seluk.
Tanba nee mak memorandu neebe asina ho KPK, se karik iha kazu ruma neebe ligasaun ho ita nia ema sira ka ema estranjeiru sira neebe komete krime korupsaun iha Timor Leste, ita mos bele husu tulun KPK atu fornese informasaun bele ajuda buka tuir sasan nee iha Indonezia iha ka lae, hanesan konta osan nian uma no mos rai, hodi bele tulun KAK Timor Leste atu prosesu nee ba oin.
“Ho kooperasaun nee KAK haruka nia ema sira ba tuir formasaun iha KPK la selu ba iha formasaun ninian, ita prepara deit bilhete no fatin neebe hela ba, no despeza la dun boot, tuir kooperasaun neebe ita estabelese ona,” dehan nia.
Dehan kona-ba ezaminasaun ba iha materia sira, ita nia PSIK iha kbiit ona, presiza mak iha kooperasaun sira seluk hanesan formasaun, troka informasaun hanesan ema ida nee envolve iha krime nia sasan iha Timor la iha, se nia rai iha fatin seluk bele husu tulun sira bele fornese informasaun.
Hatan kona-ba lei objeitu sira, dehan se lei nee iha bele ajuda KAK, maibe durante nee implementa hela hanesan prosesu sira neebe desizaun ona husi Tribunal, kondenadu sira tama kadeia sira nia sasan balu afavor ba Estadu.
Komisariu dehan, delegasaun neebe ba halo vizita iha KPK aguarda servisu atendimentu, ligasaun ho objeitu aprendidu ka sasan sira neebe prende iha KPK nian no sasan sira neebe ligasaun ho korupsaun tau hotu iha fatin neeba.
Informa liu tan, husi vizita nee haree kondisaun iha neeba oinsa atu halo planu ba iha futuru, hanesan KAK nian edefisiu neebe sei hari sei hare mos fatin kiik ida, atu objeitu aprendidu labele estragus, atu iha leilaun karik nia valor mos sei iha.
Iha fatin hanesan, Xefe Departamentu Inspesaun Komando Jeral PNTL, Superintendente Xefe Polísia José Soares dehan, hanesan ajente kudisial atu servisu hamutuk oinsa haree ba sistema maneira servisu husi KPK nian, kada nasaun nia kuadru legal la hanesan, ema nian sistema neebe integradu haree ba iha asuntu kombate korupsaun no Prokurador iha KPK nia laran, Polisia integra mos iha KPK nia laran iha sistema rai seluk nian.
“Ita nian ajusta tuir kuadru legal neebe mak iha, servisu iha fragmentasaun ba iha Kombate Korupsaun nian KAK iha kompetensia tomak, PNTL haree ba iha krime jeral,” dehan nia.
Nia hatutan, hanesan ajente judisial neebe tutela ba iha Prokuradoria, presiza atu servisu hamutuk nunee informasaun neebe fo sai atu prosesu lao ho diak, nunee ikus mai bele hetan finalidade neebe mak diak.
(ter)
