MATEBIAN, STLTIMORLESTE.com – Haksolok FC halakon ekipa Lebenei FC ho skore 2-1 no sai kampiaun iha jogu final Burre Cup futsal, neebe realiza iha Postu Administrativu Matebian, Munisipiu Baukau.
Prezidente Komisaun Organizadora Burre Cup, Edmundo Jeronimo Da Costa hateten, jogu nee realiza iha loron 09 Agostu tinan 2025 hahu abertura husi klube 18 iha Postu Matebian no Kelikai, neebe too iha fulan Setembru nee klube 4 hanesan Maluru Kraik FC kaurta klasifikasaun, Anoan FC terseiru klasifikasaun, Tabere FC segundu klasifikasaun no Haksolok FC primeiru klasifikasaun iha jogu nee.
“Premiu neebe klasifikasaun sira hetan, ami komisaun organizadora prepara hela taxa unidade 3, inklui orsamentu tuir komunikasaun nia forsa,” hateten Edmundo ba jornalista sira, iha Matebian, Segunda (08/09/2025).
Edmundo esplika, premiu neebe parte komisaun organizadora prepara atribui ba primeiru klasifikasaun taxa ho osan US$ 250,00, segundu klasifikasaun taxa ho osan US$ 175,00, terseiru klasifikasaun taxa ho osan US$ 125,00 enkuantu kuarta klasifikasaun hetan osan US$ 50,00.
Aleinde ida nee nia mos dehan, orsamentu ba jogu komunitariu nee kontribui husi komunidade sira, objetivu atu promove labarik foin sae sira nia talentu neebe sei mutik ba futebol nian no seluk tan mak eduka foinsae sira atu prevene fuma no komsumu alkolika inklui buka fini jogadores ba futebol nian, tanba jogu refere ho tipu sub-16 neebe hetan apoiu husi membru FALINTIL Júlio da Costa “Burre”.
“Jogu ida nee buka fini no eduka foinsae sira seluk mak ami atu dignifika Aman luta nain sira nian neebe luta ba libertasaun nasional, tanba ba Cup ida nee apoiu masimu husi ita nia Aman Burre,” Edmundo akresenta.
Iha fatin hanesan FALINTIL, Júlio da Costa “Burre” hateten, prosesu ukun aan presiza priense atividades oi-oin iha pasu dezenvolvimentu, tanba nee apoiu jogu komunitariu refere hodi buka fini jogadores futebol nian husi baze ba kompete iha Munisipal no Nasional.
“Mezmu hau beik, maibe hau apoiu netik sira para jogador tenke lao ba oin hau halao ida nee atu ba Munisipiu no Nasional. Hau foin primeira vez halo jogu nee halibur hau nia joven sira halo oinsa joga lao ba oin no kria paz dame iha Postu Matebian nain,” katak Burre
Entretantu Offisial husi Klube Haksolok FC, Reinaldo Boavida Freitas sente kontente, tanba komunidade sira inklui Aman Júlio da Costa “Burre” nia kontribusaun masimu hodi inisia jogu refere halibur jovem sira iha Postu Administrativu Matebian.
“Jogu nee foin primeiru vez ami loke, maibe ami sente kontente, tanba sai primeiru lugar. Jogu nee ami halakon klube 5 ami sente kontente ami sei lori ami nia klube nee ba oin ba Munisipiu too Nasional,” Reinaldo espresa.
Nia rekonhese jogu Burre Cup foin primeira vez akontese no tuir planu husi komisaun sei realiza kada tinan, tanba sei utiliza orsamentu US$ 250,00 treina jogadores sira prepara aan diak liu tan ba epoka tuir mai no possibilidade bele lori jogadores sira ba kompete, iha nivel Munispiu no Nasional bainhira iha eventu futebol sub-16.
Jornalista: Tomas Reis
Editora:Carme Ximenes
