DILI, STLTIMORLESTE.com – Nasaun ba oin presiza lider tuan sira nia hamutuk no presiza halakon arogansia, nunee bele lori povu no rai nee ba moris diak.
Lia hirak nee hatoo husi Diretor Ajar, Jose Luis de Oliveira ba STL liu husi telefone, Kuarta (13/11/2024).
Nia hatete, joven sira tenke luta ba futuru, tanba futuru nasaun iha joven sira nia liman, no husi lider tuan sira presiza hamutuk hodi rezolve problema neebe iha, nunee bele lori rai nee ba oin.
“Los presiza hamutuk no halakon arogansia hotu, too agora roo Haksolok deit la rezolve deit, no roo Haksolok nee komete husi lider politiku partidu boot rua nee, sira hanesan deit, mai hau sira hanesan deit,” katak nia.
Nia hatutan, atu obriga sira unidade mos susar, tanba idade ba daudaun ona, maibe jerasaun foun mak tenke luta hodi konkista ba futuru neebe diak.
Nia hatutan, uluk jerasaun tuan luta atu liberta Timor Leste husi kolonializmu no okupante, agora jerasaun foun tenke luta hasoru lider sira neebe hariku aan deit nee.
Nunee mos Diretor Ezekutivu FONGTIL, Valentin Da Costa Pinto hatutan, joven sira uluk unidu tanba hakarak ho objetivu ida hodi lori rai nee oin.
“Joven uluk unidus los, tanba ita luta ba asuntu neebe importante ba ita nia rai ninia destinu, maibe ita rekonhese husi tempu neeba joven sira iha duni degradasaun ida neebe hatudu ita la unidu la komunga espiritu neebe joven luta nain sira hatudu, ita iha problema oituan, no dezafiu oituan kona-ba ita nia unidade, tanba nee ita tenke rekonhese nee laos segredu ona,” katak nia.
Nia hatutan, joven neebe inklina aan grupu inves sai hanesan rekursu ida para promove diak liu tan iha unidade, maibe haree realidade sira la unidu.
Iha situasaun balun tan joven sira neebe hatudu situasaun neebe sira tenke hili opsaun ruma, joven produtivu barak tenke halo evakuasaun ba rai liur buka moris, no joven produtivu barak laiha servisu.
Nunee mos Jeneral Reformadu Lere Anan Timor hatete, jerasaun tuan tenke sai ezemplar ba jerasaun foun, hanoin jerasaun foun tenke aprende ho kondisaun neebe uluk maun, aman sira hatudu, sira biar liman tanan, maibe fo nia hirus matan ba inimigu, tanba deit ukun rasik aan.
(eme)
