DILI, STLTIMORLESTE.com – Tinan ida nee halakon ona Ekipa Jestor Programa (EJP) no eskola idak-idak mak sei jere programa merenda eskolar.
Tuir Belchior Maria Almeida Barros, hanesan Xefe Departamentu Programa Merenda Eskolar iha Ministeriu Edukasaun (ME) hatete, ME nafatin halo koordenasaun ho Ministeriu Administrasaun Estatal (MAE) no Ministériu Saude (MS) ba iha implementasaun programa merenda eskolar, neebe durante nee lao iha eskola, tuir dekretu governu EJP halakon ona, no fila fali ba eskola idak-idak mak sei jere merenda eskolar suku ho grupu komunidade.
“Ami nian linha koordenasaun ho parte MAE ho MS lao hela, liu-liu haree ba iha implementasaun programa merenda eskolar neebe mak durante nee lao iha ita nian eskola sira iha teritoriu Timor laran. Maibe ba tinan ida nee merenda eskolar seidauk lao, tanba agora daudaun sei iha prosesu hein dekretu lei ba ezekusaun orsamentu 2026 nia,” dehan Belchior ba jornalista STL iha nia knaar fatin, Kuarta nee (07/01/2026).
Nia hatutan, iha tinan kotuk 2025 programa merenda eskolar lao iha eskola hanesan baibain, no ministériu nafatin iha linha koordenasaun servisu neebe diak ba iha implementasaun programa merenda eskolar ninia.
Jornalista: Jacinta Sequeira
