LAUTEM, STLTIMORLESTE.com – Governu liu husi Ministeriu Saúde (MS) husu ba Autoridade Lokal sira hamutuk ho komunidade halao limpeza jeral iha idak-idak nia uma hodi prevene moras dengue.
Diretora Jeral Kuidadus Saude Primaria, Elizabeth Leto Mau hatete, komesa udan monu rai no tempu moras dengue, tanba nee husu ba Autoridade Munisipiu Lautem hamutuk ho komunidade sira tenke halao atividade limpeza.
“Autoridade lokal sira tenke hamutuk ho ita nia komunidade halo limpeza hodi prevene ba moras dengue,” hatete Elizabeth ba STL iha Lospalos Vila, Sabadu (04/01/2024).
Nia deklara, Governu liu MS husu ba Autoridade Lokal sira iha Munisipiu Lautem nian, hodi avizu ba kominidade sira halo limpeza iha idak-idak nia uma.
“Tenke avizu ba iha ita nia komunidade nomos ba Sentru Saude Lospalos avizu mos ba komunidade sira halo limpeza iha idak-idak nia uma, nomos servisu hamutuk ho Igreja atu nunee avizu mos kona-ba prevensaun ba moras dengue,” nia koalia.
Nia hatutan, iha tinan kotuk Sentru Saude Lospalos rejistu kazu dengue hamutuk 24, tanba nee ba tinan ida nee bele menus ou laiha kazu dengue iha Munisipiu Lautem diak liu tan.
“Sei ita hakarak kazu dengue laiha hanesan hau hatete, katak familia idak-idak tenke halo limpeza iha ida-idak nia bairu,” nia hatutan.
Iha fatin hanesan, Anita Ximenes nuudar komunidade Lospalos Vila dekalra, sira sempre limpeza iha idak-idak nia uma, tanba hakarak halo prevensaun ba moras dengue nee rasik.
“Ami iha Lospalos Vila sempre halo limpeza iha idak-idak nia uma no ami sempre soe iha lixu fatin, ita haree rasik Lospalos Vila ambiente moos no saudável,” nia afirma.
(jen)
