DILI, STLTIMORLESTE.com – Komunidade balu neebe mak halo negosiu faan sasan iha areador Eskola Sekundariu Jeral nu. 4 Setembru Balide, sira tenke koopera ho eskola bainhira estudante sira sai, sira organiza malu halao limpeza iha areador eskola refere.
Lia hirak nee hatoo husi Diretor Eskola Sekundariu Jeral nu. 4 Setembru Balide, Sergio A. da Cruz ba jornalista STL iha nia knaar fatin Balide, Kinta nee (01/05/2025).
“Ami mos halo enkontru ho ita nian maluk sira neebe mak faan sasan iha areador eskola ninia, ami enkontru ho sira, husu ba sira katak, ita boot sira mai faan sasan iha areador eskola nian nee, depois problema foer ou lixu sira nee tenke halo limpeza tau fali iha fatin lixu. Nuudar Diretor Eskola nafatin husu ba sira katak, imi tenke koopera ho eskola, bainhira estudantes sira sai husi eskola ba uma, ita boot sira halo limpeza iha areador eskola,” dehan nia.
Sergio dehan, hakarak faan sasan iha areador eskola nian tenke hamoos kedas, tanba nuudar Diretor Eskola hakarak ambiente eskola nee tenke moos, se lae halo karta ba iha munisipiu para mai sobu tiha fatin neebe uza ba faan sasan sira nee, maibe sira mos koopera ho parte eskola.
“Ita nian komunidade neebe mak halo atividades negosiu iha areador eskola ida nee, sira mos koopera ho eskola, hau sempre husu ba sira bele faan ita boot sira nian sasan iha nee, maibe tenke tau lixu iha fatin, tanba hau hakarak eskola nee iha ambiente ida neebe mak moos, maibe sira organiza malu halo limpeza iha areador eskola,” katak nia.
Iha fatin seluk, Diretor EBC 10 de Dezembru Komoro, Calistro A. Guterres hatete, areador eskola nee tenke moos no komunidade neebe hela iha areador eskola ida nee, nunee mos ba sira neebe faan sasan iha nee, oinsa sira tau lixu iha fatin neebe mak prepara ona.
“Ita hakarak ambiente eskola nee moos, tanba nee ita husu ba ita nian komunidade neebe hela iha nee no sira neebe faan sasan iha nee oinsa tau lixu iha fatin,” tenik nia.
(jac)
