DILI, STLTIMORLESTE.com – Tribunal Judisial Primeira Instansia Dili (TJPID) Kinta nee halao julgamentu ba arguidu ho inisial FCG, tanba halo agresaun fizika hasoru lezada inisial VS hanesan feen.
Iha sala julgamentu laran Juiz singula Jose Quintao lee sai akuzasaun nebe iha katak, arguidu ho lezada hela no moris hamutuk iha uma ida nuudar fen ho laen dezde tinan 2019.
Durante forma sira nia uma kain, arguidu ho lezada kous oan nain rua, feto ida mane ida, ekonomikamente dependensia ba malu.
Iha loron 23 fulan Agostu tinan 2024, porvolta 12:00 kalan boot OTL, arguidu halo agresaun fizika hasoru lezada iha sira nia uma Delta 1, Komoro.
Motivu husi problema tanba arguidu sai ba hemu tua ho nia kolega sira neebe mos hela besik malu nia uma, iha oras 23:30 OTL, arguidu foin fila ba uma.
Momentu arguidu fila ba uma no tama ba kuartu laran atu toba, lezada koalia ba arguidu katak, o la moe ka lao kalan, sai hanesan nee mak katuas koalia hela deit, tanba nee mak halo arguidu nervozu hodi liman tuku kedas dala ida ba lezada nia matan parte karuk, hodi rezulta bubu no mean.
Konsekuensia husi agresaun arguidu nian, lezada sente moras tanba bubu no mean iha lezada nia matan parte karuk.
Arguidu halo ho forma livre, ho depropozitu halo agresaun fizika hasoru lezada nuudar arguidu nia kaben, katak aktus mak arguidu halo hasoru lezada, konsidera hanesan meiu ida hodi halo moras ba lezada nia isin, tuir buat neebe mak hakerek ona iha leten.
Hahalok arguidu nian ho konsiensia rasik no hatene katak hahalok nee lei bandu, maibe arguidu halo nafatin.
Ho hahalok sira nee konsidera arguidu FSG hanesan autor material ho forma konsumadu, pratika krimi ida Violensia Domestika tuir artigu 3 husi Lei n° 7/2010, ho forma ofensas integridade fizika simples, tuir artigu 145 husi Kodigu Penal.
Hatan ba akuzasaun neebe iha, arguidu konfesa imparsial ba faktus katak, arguidu halo duni faktus refere, arguidu mos konfesa kona-ba motivu neebe iha.
Arguidu mos promete ba tribunal katak, nia sei la halo tan agresaun fizika hasoru nia feen iha futuru.
Iha sala julgamentu laran lezada mos haforsa tan akuzasaun katak, arguidu halo duni agresaun ba lezada, tamba nee mak lezada sente ladaik hodi hatoo keiza.
Lezada mos deklara tan katak, la too fulan tolu arguidu husu deskulpa ba lezada ho nia familia sira, nomos arguidu fo sala ba lezada nia familia fo osan montante US$ 500 no tua inklui tais. Agora arguidu ho lezada diak malu ona no sira nain rua moris hamutuk hanesan feen ho laen.
Rona hotu parte rua, tribunal husu Ministeiru Publiku (MP) atu tama ba iha alegasaun. Iha alegasaun nee Prokurador Renato Bere Nahak husu ba tribunal atu aplika pena multa tuir arguidu nia nesesidade neebe iha. Ministeiru Publiku mos husu ba arguidu labele repete tan nia hahalok ida nee iha futuru.
Enkuantu parte defeza mos konkorda pedidu husi Ministeiru Publiku.
Rona tiha parte rua tribunal singular deside rona kedas desizaun.
Tribunal singular fo sai akordaun, deside aplika pena multa US$ 60 no arguidu sei la selu US$ 60 mak arguidu sei tama prizaun durante loron 40.
Tribunal mos fo hanoin ba arguidu katak, labele halo tan agresaun fizika hasoru feen oan no ema neebe de’it.
Audensia julgamentu nee preside husi Juiz singular Jose Quintao, Ministeiru Publiku reprezenta husi Prokurador Renato Bere Nahak, arguidu hetan asistensia legal husi Defensor Publiku, Nelson.
(ter)
