DILI, STLTIMORLESTE.com – Tribunal Judisial Primeira Instansia Dili halao julgamentu ba arguida ho inisial FS, tanba halo agresaun hasoru nia laen AM hanesan laen.
Tuir akuzasaun neebe iha katak, ofendidu AM moris hamutuk hanesan fen ho laen, ho arguida FS iha tinan 2009, iha oan nain 6 no ekonomikamente dependensia ba malu.
Iha loron 9 Julhu 2024, haleu oras tuku 09:00 OTL, tha Aldeia Aidak Bihare (fatu Ahi), Dili, ofendidu lori liman tuku dala ida kona iha arguida nia tilu hun, mak arguida mos hader mai lori liman kukun rakut ofendidu nia hirus matan.
Konsekuensia direta husi arguida nia hahalok nee ofendidu hetan kanek iha hirus matan.
Kauza husi problema nee tanba ofendidu halo modo han mesak, nunee arguida koalia barak mak ofendidu nervozu hodi halo agresaun fiziku nee, tanba nee arguida mos hodi halo fali agresaun fizika hasoru ofendidu.
Arguida FS halo ho forma livre, deliberada no konsientemente, hatene katak lori liman kukun rakut ofendidu nia hirus matan nuudar meiu nebe aptu hodi hamosu ofensa ba lezadu nia isin lolon no saude.
Arguidu hatene katak nia hahalok nee proibidu no punidu tuir lei penal.
Tanba nee konstitui arguida nuudar autor material ho forma konsumadu ba pratika krimi ofensa ba integridade fizika simples ho forma violensia domestika 1, previstu no punidu tuir artigu 145º husi Kodigu Penal konjuga ho artigu sira 2, 3 alinea a) no art. 350 alinea b) hosi Lei Kontra Violensia Domestika n.°07/2010, loron 07 fulan Julhu.
Hatan ba akuzasaun neebe iha, arguida konfesa imparsial ba faktus katak, depois de akontese sira rezolve kedan tuir kultura no hahu husi neeba mai too agora la iha tan problema ona. No lezadu mos reforsa tan ho akuzasaun neebe iha.
Tribunal haree katak arguida konfesa imparsial ba faktus, tanba nee husu ba iha Ministeriu Publiku liu husi Prokurador Napoliao da Silva atu tama ba iha alegasaun, no iha alegasaun Prokurador husu Tribunal atu aplika pena multa ba arguida. Enkuantu husi defeza husu Tribunal atu aplika pena Admoestasaun ba arguida tanba sira diak malu ona.
Rona tiha alegasaun, Tribunal adia ba loron seluk hodi rona desizaun.
Prosesu nee.prezide husi Juiz Singular, Jose Quintao, Ministeriu Publiku reprezenta husi Prokurador Napoliao da Silva, arguidu hetan asistensia legal husi Defensora Publika Laura Valente.
(ter)
