DILI, STLTIMORLESTE.com – Komunidade neebe halo atividades negosiu iha areador Ensinu Baziku Sentral (EBC – sigla português) 10 Dezembru Komoro nee aumenta lixu iha eskola refere.
Asuntu nee hatoo husi Diretor EBC 10 Dezembru Komoro, Calistro A. Guterres ba jornalista STL iha nia knaar fatin Komoro, Kuarta nee (18/06/2025).
“Difikuldade neebe ami enfrenta mak primeiru kona-ba lixu, tanba kada tinan ami sempre halerik ba limpeza nee, liu-liu ami nian estudantes sira dader mai eskola tenke halo limpeza, primeiru komunidade sira halo negosiu iha areador eskola, segundu ami nian eskola besik merkadu, liu-liu sira neebe faan hahan iha eskola, ida nee bele aumenta lixu iha eskola,” nia esplika.
Calistro dehan, estudantes sira nee han merenda eskolar, maibe komunidade sira nee faan tan nasi kotak, husi ida nee mak aumenta lixu iha sira nian eskola, tanba estudantes sira han hotu la tau kotak nee iha fatin.
“Dala barak ami koalia beibeik ho negosiante sira katak, karik ita boot sira bele prepara fatin lixu ba estudantes neebe han,” nia esplika.
(jac)
