DILI, STLTIMORLESTE.com – Eskola Sekundariu Jeral (ESJ) nu. 4 Setembru Balide halo ona pedidu ba Ministeriu Edukasaun (ME) hodi bele halo moru iha eskola refere.
Lia hirak nee hatoo husi, Diretor Eskola Sekundariu Jeral nu. 4 Setembru Balide, Sergio A. da Cruz ba jornalista STL iha nia knaar fatin Balide, Segunda nee (14/04/2025).
“Difikuldade neebe mak ami enfrenta mak kona-ba moru, tanba ami hakarak moru protesaun ba ami nian eskola, tanba iha parte kotuk neeba moru seidauk diak, maske ami halo ona pedidu ba Ministeriu nee iha ona, depois husi parte inspetor sira mai ami relata hela asuntu ida nee ba sira,” nia informa.
Iha parte seluk, Diretor Diresaun Nasional Infraestrutura no Edukativu iha ME, Helio Lopes hatete, tanba nee prioridade hirak nee fazeadamente, moru dala ruma ba tinan sira tuir mai, no agora konsentra ba fasilidade importante sira hanesan sala aula, haris fatin, instalasaun bee moos, sala profesor, iha kondisaun neebe minimu molok hakat ba konstrusaun moru.
“Moru protesaun ME sei konsidera iha tinan orsamentu tuir mai, tanba eskola barak presiza moru, maibe ita nia orsamentu ita konsentra ba fasilidade sala de aula, sala profesor nia, ita fo instalasaun bee moos ba eskola sira. Ita prioritiza hirak nee, hafoin ita halo konstrusaun ba moru iha eskola sira neebe la iha. Ita labele halo uluk konstrusaun ba moru maibe iha kazu balun neebe eskola balun presiza tebes sala de aula,” tenik nia.
Nunee mos Koordenador Pre Eskolar Sagrada Familia Vila Verde, Cornelio Antonio Soares hatete, presiza iha moru neebe mak diak, atu nunee bele asegura estudante sira, tanba eskola ida nee besik hela estrada ibun, maibe daudaun nee sira iha portaun para dader estudante sira tama eskola, nee bele taka ona portaun nee.
(jac)
