DILI, STLTIMORLESTE.com – Akademiku konsidera katak, presiza halo revizaun ba iha Kodigu Penal, tanba publiku sira preokupa ho artigu balu.
“Hau hanoin bele halo revizaun ba iha artigu balu, tanba ita nia publiku sira kestiona ho artigu balu, tanba seidauk responde ba iha publiku sira nia hakarak,” dehan Finalista Universidade Nasional Timor Lorosae (UNTL), Alberto dos Santos ba jornalista STL iha Kaikoli, Sesta (11/04/2025).
Nia dehan, foin lalais akontese ona asaun balu husi publiku sira liu-liu kona-ba krimi omisidiu neglijente, neebe ikus mai autor hetan suspensaun, halo familia la satisfaz. Husu ba iha parte relevante oinsa haree kona-ba publiku sira nia preokupasaun nee, tanba sira hatoo ezizensia atu halo alterasaun ba lei balu.
Iha fatin ketak, Ministru Justisa, Sergio da Costa Hornai hateten, krimi omisidiu neglijensia nee iha tiha ona, haree artigu 140 iha neeba koalia kona-ba sei krimi ho neglijensia ho groseiru nee katak, se ema nee nia halo krimi ruma nia ladun falta kuidadu ho groseiru, entaun ida nee sei penaliza nia.
Nia esplika, iha artigu 140 Kodigu Penal kona-ba omisidiu neglijensia numeru 2 koalia kona-ba krimi ida pur neglijensia groseira, katak iha kazu neebe ajente aktua ho neglijensia groseira nia sei hetan pena prizaun too tinan 5.
“Hau hanoin Kodigu Penal ita komesa halo ona revizaun, tempu badak ami sei tuur hamutuk hodi haree esbosu, ita halo diskusaun ita troka hanoin iha halo ona diskusaun ho komisaun A iha Parlamentu Nasional, ita iha ona esbosu, hein ita halo submisaun Konselhu Ministru,” dehan governante nee.
Nia hatutan, bainhira kuandu halo ona submisaun ba Konselhu Ministru mak foin halo apresiasuan hodi akomoda buat neebe ema hotu-hotu hakarak, para ajusta ba realidade neebe iha no mos fo dignidade ba sidadaun sira hotu.
(ter)
