DILI, STLTIMORLESTE.com – Provedor Direitus Humanus no Justisa (PDHJ) konsidera katak, importante atu entidade relevante halo sosializasaun kona-ba lei sira neebe iha, atu publiku bele iha konhesimentu kona-ba lei sira.
Tuir Provedor Direitus Humanus no Justisa, Virgilio da Silva Guterres katak, edukasaun sivika lo-loos tenke sai programa ka atividade neebe importante husi Estadu no mos sosiedade sivil, husi entidade Estadu sira hanesan PDHJ, KAK, Komisaun Funsaun Publika no entidade sira seluk iha papel atu halo sensibilizasaun.
“Ministeriu no entidade Governu inklui Parlamentu Nasional iha papel halo sosializasaun kona-ba lei sira neebe parlamentu fo sai. Lembra fali katak, kuandu PN halo lei kona-ba protesaun ba labarik no joven sira iha risku, partisipa iha seminariu sensibilizasaun neebe envolve Komisaun F no Ministeriu Justisa, atividade hanesan nee kontinua lao,” dehan Provedor ba jornalista sira iha Kaikoli, Kuarta (14/01/2026).
Provedor informa, Estadu no Ministeriu relevante sira tenke nakloke liu husi plataforma dijitál neebe iha, hanesan website no facebook atu kontinua fo informasaun ba publiku kona-ba lei sira neebe aplika ona.
“Ministeriu Justisa iha knaar importante atu halo sosializasaun lei kona-ba rai nian, tenke sosializa atu publiku hatene, liu liu kamada intelektual sira atu sosializa konaba lei aplikabel sira,” dehan nia.
Provedor konsidera, importante halo sosializasaun kona-ba lei neebe mak aplika ona, nunee publiku bele hatene klean.
Iha fatin ketak, Akademiku UNTL, Sebastiao Dos Santos dehan, importante duni kria ekipa ida atu halo sosializasaun kona-ba lei sira neebe iha ba komunidade sira.
“Importante duni halo sosializasaun kona-ba lei sira neebe iha, nunee ita hotu bele iha konhesimentu diak, bainhira hasoru krime ruma fasil atu hatoo keixa,” dehan nia.
Nia hatutan, ohin loron krime kontinua aas, tanba nee presiza sosializa lei sira neebe iha, kuandu ema ida iha konhesimentu klean kona-ba lei, nia mos sente ona tauk no prevene atu pratika krime.
Nunee husu atu entidade sira presiza haree kestaun nee, tanba ohin loron konhesimentu kona-ba lei menus, bele mos kauza numeru krime aumenta aas.
(ter)
