DILI, STLTIMORLESTE.com – Autoridade Protesaun Sivil (APC – sigla português) hamutuk ho Cruz Vermelha Timor Leste (CVTL) haforsa servisu, hodi halo jestaun diak ba risku dezastre naturais.
Prezidente Autoridade Protesaun Sivil, Jejuino dos Reis de matos Carvalho hatete, objetivu husi enkontru nee tur hamutuk hodi fo hanoin ba malu oinsa atu haforsa liu tan jestaun ba risku dezastre, tanba Governu prevee orsamentu no parseiru sira mos fo apoiu, maibe APC mos tenke prepara aan halo didiak.
Nia parte agradese ba CVTL, tanba hakarak fasilita sorumutu ida nee ho ONG lokal mai hamutuk oinsa atu haree no haforsa liu tan hodi halo jestaun diak ba redus risku ba dezastre naturais
“Ami hakarak halo jestaun neebe mak diak, durante nee servisu hamutuk, ami hakarak atu hametin liu tan hodi haforsa malu no hakbiit malu entre Governu ho parseiru sira hotu para fo hanoin, halo jestaun diak ba reduz dezastre, nunee bele tulun ita nia komunidade sira,” dehan nia ba jornalista sira iha Salaun CVTL, Bairu Farmoza, Kuarta (26/03/2025).
Nia haktuir, dezastre nee bele hatete katak nia klasifikasaun neebe boot ka kiik mosu loron ka kalan falta nee mak buat ida hakarak fo hanoin ba komunidade tenke iha sensiblizasaun ba sira para sira bele komprende no sira bele hatene bainhira kuandu dezastre nee mosu.
“Ami iha diresaun kona-ba kampanha edukativu ba komunidade hotu-hotu atu dook husi dezastre, iha sidade ita hatene ona hotu-hotu hakarak halo uma andar, maibe la tau atensaun, dala ruma ita halo buat kiik hanesan linha eletrisidade nee mos fo risku, bainhira halo instalasaun ne’ebe mak la tuir tekniku sira,” tenik nia.
Iha fatin hanesan, Sekretariu Jeral CVTL, Luis Pedro Pintu katak, atividade ida nee hanesan enkontru regular neebe mak regitasaun risku dezastre lidera husi APC.
“Ita agradese ba APC tanba ho hanoin tomak hakarak atu halibur ita nia parseiru sira tantu husi NGO International sira ho NGO lokal atu mai fo hanoin ba malu haree kona-ba atividade saida mak ba futuru ita bele servisu hamutuk suporta malu diak liu tan,” dehan nia.
(EST 4)
