DILI, STLTIMORLESTE.com – Diretora Administrasaun Finanseira no Servisu Lojístika iha Hospital Nasional Guido Valadares (HNGV), Sara Maria Xavier hateten, liu husi Orsamentu Jeral Estadu (OJE) 2025, HNGV sei sosa ekipamentu mediku ba hospital sira, hodi hamenus transferensia pasiente sira ba rai liur.
“Ita aloka hela fundus, iha 2025 atu sosa ekipamentu mediku ba hospital sira, atu nunee ita bele hamenus referal pasiente ba rai liur, entaun ami sei sosa ekipamentu ba operasaun matan, ortopedia, moras fuan, ekipamentu sirurjiku, nomos ekipamentu mediku ba nehan no seluk tan,” hatete Diretora Administrasaun Finanseira no Servisu Lojístika iha HNGV, Sara Maria Xavier ba jornalista sira iha Bidau, Kinta (12/12/2024).
Nia esplika, HNGV mos sei sosa ekipamentu mediku ba moras kankru nian, ho objetivu atu hamenus transferensia pasiente sira ba rai liur.
“Orsamentu aloka ona, ita hein prontu atu bele implementa iha 2025, no total fundu neebe atu sosa ekipamentu mediku nee purvolta milhaun US$ 2,” nia esplika.
Tuir Diretora nee katak, departamentu idak-idak iha HNGV hatoo ona nia planu atu sosa ekipamentu mediku nee, no orsamentu atu sosa nee aloka ona.
Nia hatutan, ekipamentu sira nee sei sosa liu husi tenderizasaun, labele sosa diretamente, maibe liu husi prosesu aprovizionamentu ida, no loke ba publiku.
(jen)
