DILI, STLTIMORLESTE.com – Tribunal Judisial Primera Instansia Dili halao julgamentu ba arguidu ho inisial CCR neebe halo agresaun hasoru lezadu ho inisial FGF.
Iha sala julgamentu laran, loron Segunda, Juiz prosesu Fransisca Cabral haree katak, krimi nia natureza semi publiku lei fo dalan atu bele dada fila, kuandu lezadu aseita.
Iha sala julgamentu laran, lezadu aseita atu dada fila krimi nee hasoru arguidu, razaun ida tanba mesak Timoroan, no besik tama loron boot ona, tanba nee lezadu tenta perdua arguidu.
Rona tiha ida nee, arguidu hamriik hodi husu deskulpa ba lezadu, no Tribunal desidi homologa prosesu nee no absolve arguidu husi instansia.
Tuir akuzasaun neebe iha katak, iha loron 28 fulan Agostu tinan 2023, iha Aldeia Toko Baru, Suku Kuluhun, ofendidu tur hodi han hela batar.
Depois haree arguidu lao liu husi ofendidu nia oin, tanba nee ofendidu dehan han batar, maibe arguidu hatan ba ofendidu ho liafuan mal.
Depois arguidu hakat besik ba ofendidu lori liman basa dala ida iha ofendidu nia ibun, hodi rezulta moras.
Konsekuensia husi arguidu nia hahalok nee, halo ofendidu sente moras hodi ba hatoo keixa.
Tanba nee Ministeriu Publiku akuza arguidu komete krime Ofensa Integridade Fizika Simples neebe previstu iha artigu 145 husi kodigu Penal.
Audensia julgamentu nee prezide husi Juiz Singular Fransisca Cabral, Ministeriu Publiku reprezenta husi Prokurador Pedro Baptista, arguidu hetan asistensia legal husi Defensor Publiku Henrique Mariz.
(ter)
