DILI, STLTIMORLESTE.com – Profesores balun iha MunisÃpiu Bobonaro hanorin kleur ona iha eskola ida, no sira ezije atu transfere fali ba eskola seluk.
Asuntu nee hatoo husi Direitor Servisu Edukasaun Munisipiu Bobonaro, Miguel Freitas ba jornalista sira STL liu husi telefone, Kinta nee (08/01/2026).
“Buat ida atraza nee iha fatin balun akontese nunee, maibe problema ka difikuldade neebe mak ita nian profesores sira enfrenta nee mak profesores balun neebe mak hanorin iha fatin nee kleur, sira ezije para atu transfere, balun profesores laiha, nee sira husu liu husi grupu monitorizasaun neebe mak ami kria husi munisipiu ninia, sira husu atu transfere ba iha fatjn seluk, tanba balun hanorin iha fatin nee kleur ona, maibe nee profesor lokal nee, agora bolsa kandidatu nee lae,” nia dehan.
Nia akresenta, bainhira sira atu halo transferensia nee, ida neebe mak atu transfere ninia fatin, sira sei identifika uluk ida nee, tanba ohin mensiona nee, profesores balun neebe mak hanorin kleur ona iha eskola nee, sira husu atu transfere ba fali eskola seluk.
Entretantu Diretor Servisu Edukasaun Munisipiu Ainaro, Patricio da Costa Magno antes nee hatete, foin daudaun bolsa kandidatu profesor ida mak husu atu muda fali ba iha Dili, tanba ho kondisaun rai malirin nee la tahan, tanba nia hanorin iha postu administrativu Maubesi, maibe iha sirkular ida sai ona husi ME nee katak sei labele muda fatin hanorin.
“Foin daudaun ita nian bolsa kandidatu profesor ida mak husu atu muda fali ba iha Dili, tanba ho kondisaun rai malirin nee la tahan, tanba nia hanorin iha Postu Administrativu Maubesi, maibe iha sirkular ida sai ona husi ME nee katak sei labele muda fatin hanorin,” katak nia.
Reportajen: Jacinta Sequeira
