DILI, STLTIMORLESTE.com – Tuir lei baze de edukasaun katak, ema neebe hanorin estudantes iha nivel sekundariu nee tenke ho grau lisensiatura, laos baxarelatu.
Haktuir Diretor Nasional Ensinu Sekundariu iha Ministeriu Edukasaun, Benjamin Gomes da Cruz Fernandes ba jornalista STL iha nia knaar fatin Vila Nova, Kuarta nee (04/02/2026).
“Buat nee hanesan nee tuir lei baze de edukasaun nee dehan katak, atu hanorin ensinu sekundariu jeral minimu tenke lisensiatura, la hatete iha ensinu baziku nee katak, neebe ensinu baziku nee S2 mos bele hanorin, tanba iha lei baze edukasaun sekundariu nee selesiona katak, minimu tun liu mak lisensiatura, labele baxarelatu, ho ida nee ministériu halo ezersisiu ida stu sira neebe ho bacharelatu nee ba hanorin fali iha ensinu baziku,” nia esplika.
Benjamin hatutan, lei baze edukasaun mak haruka, nee duni labele sala kompriende katak atu hanorin S2 mak hanorin sekundariu lae, tanba iha lei nee mak temi dehan katak, tun liu mak S1, atu nunee baxarelatu labele hanorin sekundariu, tanba estudantes iha sekundariu nee ho nivel grau neebe mak boot ona, laos bacharelatu mak hanorin fali, nee atu koalia kualidade nee atu halo nusa.
“Ita nian lei baze de edukasaun nee mak temi dehan, ba nivel ensinu sekundariu minimu mak lisensiatura, labele baxarelatu, entaun Ministeriu Edukasaun halo ezersisiu ida hodi koloka fali profesores sira nee ba iha ensinu baziku. Tanba iha ensinu baziku mos presiza hela profesores, lrofesores reforma iha mil resin, nee mak ami koloka sira ba ensinu baziku, hanorin iha terseiru siklu,” dehan nia.
(jac)
