DILI, STLTIMORLESTE.com – Ministeriu Edukasaun (ME) fo ona apoiu komputador 30 ba eskola sekundariu balun, neebe agora daudaun profesores sira hanorin uza sistema eletroniku.
“Nee ami sei haree ba iha ami nian orsamentu, maibe ami sei buka meus oinsa para bele hetan ajuda, atu nunee bele fasilita nafatin ita nian eskola neebe ita seidauk fo apoiu komputador ba ita nian eskola Sira,” dehan Direitor Nasional Ensinu Sekundariu iha ME,Benjamin Gomes da Cruz Fernandes,ba STL Tersa nee (24/02/2026).
Nia dehan, eskola Sekundariu Jeral 10 Dezembru Komoro seidauk hetan komputador, tanba eskola refere ninia edifisiu rasik sei hamutuk ho Ensinu baziku, atu nunee bele tau ekipamentus iha nee ba, nee duni ME nafatin fo apoiu ba eskola sekundariu neebe seidauk hetan ekipamentus komputador.
“Ami sei esforsu aan nafatin hodi bele apoiu ekipamentus eletronika ba ita nian eskola hirak neebe ita seidauk fo apoiu ba sira, tanba eskola balun ita hahu fo ona apoiu, agora balun mak seidauk,” katak nia.
Entretantu Diretor Eskola Sekundariu Jeral FINANTIL, Aniceto Berlelo dehan, profesores kada materia husi Eskola Sekundáriu Jeral FINANTIL hahu uza projetor ba iha prosesu ensinu aprendizajen ba estudantes sira.
“Ami iha ona mudansa, tanba ami nian sala uza ona projetor, tanba nee ami nian profesores sira halao aprendizajen nee uza ona projetor deit, tanba ami instala hotu ona iha ami nian sala aprendizajen neen no sira seluk neebe mak seidauk nee uza projetor movel, nee uza ba iha materia hotu, husi kada profesores ida-idak nee uza hotu projetor,” tenik nia.
Nia dehan, uza projetor nee hahu iha fulan Janeiru tinan ida nee, tanba husi ME halo distribuisaun dijitalizasaun ba iha sira nian eskola, nee duni fulan rua tolu mai kada estudantes mai eskola tenke lori telemóvel, lori livru nafatin, inklui lori ho laptop, atu nunee estudantes sira mos bele halo pratika ida nee.
“Dala ruma profesor ida rai hela materia ba sira atu nunee estudantes sira mak halo operasi, durante iha implementasaun ba dijitalizasaun nee prezensa estudantes sira nian kada loron iha eskola kapas tebes, tanba sira gosta, tanba nuudar estudantes nee hakarak ba oin, laos atu ba fali kotuk,” nia afirma.
Nunee mos Diretor Eskola Sekundariu Jeral 10 Dezembru Komoro, Manuel Verdial dehan, sira nian ensinu aprendizajen sei nafatin hanesan baibain, tanba sira seidauk hetan projetor, maske eskola públiku balun mak hetan ona.
“Hau hanoin ami nian eskola la hetan projetor, maibe ita nian eskola seluk agora daudaun halao aprendizajen nee hahu uza ona dijitalizasaun, tanba hetan fasilidade husi ita nian Ministériu, maibe ami nian eskola rasik seidauk hetan,” nia esplika.
(jac)
