DILI, STLTIMORLESTE.com – Tribunal Judisial Primeira Instansia Dili halao julgamentu ba arguida ho inisial EFM, tanba komete krimi hasoru lezada ho inisial MS.
Iha sala julgamentu laran loron Kinta nee (10/04/2025), Juiz Prosesu haree katak, krimi refere nia natureza semi publiku, lei fo dalan atu dada fila, bainhira lezada hanesan vitima aseita atu dada fila krimi refere.
No Tribunal konfirma ba iha lezada, lezada mos aseita atu dada fila krimi nee, tanba razaun ida lezada haree arguida hanesan ema neebe idade boot. No lezada mos husu ba iha Tribunal aseita dada fila krimi nee ho kondisaun mos, halo karta ida atu iha futuru arguida labele halo tan hahalok nee ba lezada ka ba ema seluk.
Iha sala julgamentu Tribunal konfirma ba arguida no arguida mos aseita ho pedidu lezada nian, arguida promete iha Tribunal sei la halo tan aktu nee iha futuru.
Rona tiha lezada no arguida nia deklarasaun, ikus mai Prokurador no Defeza husu Tribunal atu homologa prosesu refere.
No Tribunal liu husi Juiz Singular deside, homologa prosesu no absolve arguida husi instansia.
Tuir akuzasaun neebe iha katak, iha loron 05 fulan Junhu tinan 2023, iha oras tuku 11h00 iha lezada nia uma sita iha Aldeia Ametilaran, São Jose, Suku Komoro, Dili, hetan baku husi arguida ho maneira kaer iha nia fuk, hodi liman kukun rakut iha nia oin kauza nakles no raan sai.
Arguida baku lezada tanba lezada tenta hapara arguida nia oan mane neebe baku lezada nia alin mane. Problema mosu tan deit problema rai, lezada nia alin mane hahu halo konstrusaun iha rai neebe disputa hela.
Konsekuensia husi arguida nia hahalok nee, halo lezada hetan bubu kanek nakles iha hasan parte los, maibe lezada la ba halo tratamentu mediku.
Nune Konstitui arguida hanesan autor material ho forma konsumada ba krimi Ofensas Fizika Simples previstu iha artigu 145 husi Kodigu Penal.
Audensia julgamentu nee prezide husi Juiz Singular, Jose Gonçalves, Ministeriu Publiku reprezenta husi Prokurador Ricardo Leite, arguida hetan asistensia legal husi Defensor Publiku, Nelson Borges.
(ter)
