DILI, STLTIMORLESTE.com – Jurista konsidera planu estabelese Tribunal iha munisipiu sira no mos programa julgamentu movel.bele kontribui redus kazu pendente sira.
Tuir Jurista Sergio Dias Quintas katak, kazu pendente ohin loron sei aas, tanba falta rekursu humanu liu-liu numeru Juiz no Ministeriu Publiku sei la too, tanba nee mak presiza hasae numeru Juiz no MP.
“Ida seluk mak presiza estabelese Tribunal sira iha munisipiu sira tuir lei organizasaun judisiaria haruka, atu nunee populasaun husi munisipiu la presiza mai kapital hodi buka justisa, maibe justisa nee konkretiza deit munisipiu para evita prosesu labele demora,” dehan Sergio ba STL Sabadu (31/01/2026).
Nia hatutan, politika ida seluk mak kontinua hodi implementa julgamentu movel wainhira seidauk harii Tribunal iha munisipiu sira, maibe buat hotu mos Tribunal, MP no Defensoria Publika tenki halo zestasaun no konsolida didiak rekursu humanu neebe iha, se lae uma vez rekursu humanu sufisiente maibe laiha jestaun diak sei afeta nafatin ba prosesu pendentes sira nee.
“Presija iha duni julgamentu movel no mos harii Tribunal iha Munisipiu sira atu redus kazu pendente,” dehan nia.
Iha sorin seluk, Prezidente Tribunal Rekursu, Afonso Carmona dehan, julgamentu movel kontinua lao no kona-ba atu harii Tribunal iha munisipiu haat hein deit atu tama ba iha faze tau fatuk dahuluk.
“Ita rekonhese prosesu
pendente iha, tanba nee atu halo redusaun mak programa julgamentu movel sei haree atu funsiona iha Tribunal sira,” dehan nia.
Nia dehan, konaba Tribunal haat neebe harii prosesu lao hela hein deit atu tama ba iha faze tau fatuk dahuluk. Depois haat nee remata tiha mak sei planu ba fali munisipiu seluk.
(ter)
