DILI, STLTIMORLESTE.com – Inan sira neebe hasoru krimi Violensia Domestika labele tauk atu hatoo keixa, tanba lei iha atu regula aktu ida nee.
“Ohin loron krimi Violensia Domestika kontinua akontese ho numeru aas, ida nee hatudu katak inan sira iha ona konhesimentu hodi hatoo keixa, tanba nee banhira hasoru violensia iha familia labele tauk hodi hatoo keixa,” dehan Jurista Jose Maria Guterres ba STL iha Tribunal, Dili, Segunda (10/03/2025).
Nia hatutan, krimi nee akontese mai husi problema oin-oin neebe iha familia sira, maibe ida mos bele mai husi menus kampu trabalhu, ikus mai kauza ekonomia familia uma laran la sufsiente hamosu violensia iha familia.
Jurista nee reforsa, atu redus numeru neebe iha presiza kria kampu trabalhu, presiza mos kontrola emosaun bainhira mosu diskusaun ruma, tanba la iha kontrola ikus mai mosu violensia iha familia uma laran.
No lei violensia domestika oras nee daudaun iha ona, tanba nee husu atu se deit mak hasoru violensia, labele tauk atu hatoo keixa, tanba krimi Violensia Domestika krimi publiku, kuandu akontese ona violensia ita lakohi hatoo keixa, vizinhu sira neebe haree bele hatoo keixa.
Iha fatin ketak, Akademiku Universidade Nasional Timor Lorosae (UNTL), Rafael de Jesu dehan, krimi Violensia Domestika aktu neebe la diak, aplika kastigu atu ba oin labele halo tan.
“Hau hanoin aplika kastigu ba aktu ida nee atu nunee bele halo prevensaun iha futuru,” dehan nia.
(ter)
