DILI, STLTIMORLESTE.com – Jurista Jose Maria Guterres hatete, violensia vomestika hanesan krimi publiku, tanba nee se mak hasoru krimi nee labele tauk hatoo keixa ba Polisia Nasional Timor Leste (PNTL) ho autoridade sira neebe relevante.
“Hau hanoin ohin loron lei iha ona atu regula ema neebe komete krimi violensia domestika, tanba nee se mak hasoru krimi nee labele tauk hatoo keixa, tanba hatoo keixa hanesan dalan diak ida hodi prevene iha futuru,” dehan Jurista Jose ba STL, Kuarta (13/08/2025).
Nia hatutan, uluk ema hanoin krimi violensia domestika problema uma laran nian, maibe agora lei iha ona atu regula no krimi nee konsidera krimi publiku.
Tanba nee bainhira haree ema ruma pratika aktu nee iha familia, la presiza ida neebe hasoru violensia mak ba hatoo keixa, maibe ema ruma neebe haree bele hatoo keixa, tanba nee krimi publiku.
“Hatoo keixa hanesan dalan diak ida atu halo prevensaun, atu iha futuru labele pratika tan aktu nee, tanba se husik deit iha futuru bele pratika liu tan aktu nee,” dehan nia.
Iha parte ketak Akademiku Universidade Nasional Timor Lorosae (UNTL), Rafael de Jesus dehan, inan sira neebe hasoru violensia labele tauk atu hatoo keixa.
“Inan sira neebe hasoru violensia labele tauk hatoo keixa, tanba lei iha atu regula aktu sira nee,” dehan nia.
Nia dehan, inan balu dala ruma la barani hatoo keixa, maibe tenke hanoin katak hatoo keixa hanesan dalan diak ida atu eduka, hodi nunee iha futuru labele akontese tan.
Antes nee Juiz Administrador Tribunal Oekusi, Evanjelinho Belo deklara katak, krimi neebe aas iha Oekusi mak krimi violensia domestika kontra bandu.
(ter)
