AMBENO, STLTIMORLESTE.com – Komandante Jeral Polisia Nasional Timor Leste (PNTL), Komisariu Polisia, Henrique da Costa liu husi ninia deskursu, husu ba Komandu Polisia sira hotu, atu halao serbisu ho solidu, tanba dadauk nee komandu PNTL sedauk solidu.
“Ba tinan 2026, hau hatoo hela mensajen ba komandu PNTL RAEOA ho ninia estrutura sira, save atu ita susesu maka nee, serbisu hamutuk, unidade, Disiplina no profesionalizmu. Hau la baruk atu hatete ba iha Oecusse oan sira, liu-liu kolega polisia sira katak, iha komandu nee, ita sedauk solidu mak nee. Ita sedauk solidu tanba ita boot sira rasik dala ruma sente katak hau maka domina liu iha Oecusse, ou dala ruma dehan hau maka husi parte tasi ibun nian maka domina liu iha Oecusse, ou dala ruma dehan hau husi foho maka domina liu iha Oecusse. Nee lae, ita sira nee ida deit, ita serbisu hamutuk, farda PNTL neebe ita uza nee, atu serbii ita nia povu, serbii ita nia rai,” dehan Komisariu Polisia, Henrique da Costa liu husi ninia deskursu iha serimonia doasaun motorizadas ba Ofisial Polisia Suku sira iha Komandu Polisia Rejional Oecusse, Sabadu (18/12/2025).
Nia haktuir tan katak, dala ruma kolega sira la hatene dehan ida nee laloos, maibe komandante nee ninia tilun no matan nee barak.
“Dala ruma buat balun bele too uluk ona ami, komandante Jeral PNTL sedauk rona, ema seluk hasee ona komandante jeral PNTL kona ba saida maka akontese ona iha komandu neeba. Tanba nee hau hakarak aproveita oportunidade ida nee katak, natal liu ona, agora tinan foun 2026, sei imi bele harohan karik dehan buat aat nee entrega ona iha tinan tuan 2025 neebe lori ona ba tasi ka fatin neebe. Hau ohin haree hela, sei karik ba oin mak iha munisipiu sira seluk nee kazerna ka asrama polisia sira iha Oecusse, ita husik deit Polisia Oecusse oan 50% deit no 50% Polisia husi Munisipiu seluk mak mai iha Oecusse, selae polisia Oecusse oan sira hanoin katak, Timor Leste (TL) mak iha deit ona Oecusse, maibe iha Munisipiu sira seluk mos halo hela serbisu hanesan dadauk sira halo iha Oecusse,” dehan nia.
Nia haktuir tan katak, Oecusse oan balun halo serbisu iha Munisipiu seluk mos iha, ida maka Lucas Falo, Armando Pauf uluk halao serbisu ba too iha Munisipiu Manatuto, Munisipiu Bobonaro nomos Munisipiu Lospalos, sira ba haleu munisipiu seluk, entaun sira fila mai Oecusse, lori buat diak ba Oecusse, inklui Herman Metan, Angelo Quelo, Komandante Interinu PNTL RAEOA atual nee mos sempre halo serbisu movimentu ba mai ho Jaimito Hei, halao serbisu perkore Timor laran tomak maka, ohin halao fali serbisu iha Oecusse.
“Hau hakarak hameno ba ita boot sira katak, hahu iha tinan 2026, ita sei hahu ho buat foun, disiplina tenke diak, komunikasaun mos tenke diak, komunikasaun internal entre ita, tenke diak, komunikasaun sai ba liur mos tenke diak, OPS sira tenke frekoenta instituisaun PNTL iha komunidade sai diak liu tan ho Xefe Suku Sira, halakon ita boot sira nia hahalok foti aan, loko aan, arogansia, sei ita kuda nafatin hahalok sira nee, ema sei dook husi ita, tanba nee mos fo prioridade oinsa hasae kapasidade oinsa atu responde liu ba krimi organizadu sira, tanba agora ameasa sibernetika nee, ka krimi organizadu sira, nee laos deit iha TL deit maibe iha fatin hotu-hotu sempre akontese no sai ameasa global ona, tanba nee ita tenke prepara kapasidade rekursu sira atu responde situasaun sira nee,” dehan nia.
Nia haktuir tan katak, sei iha problema, tuur hamutuk hodi hadia, sei iha problema maka soe iha media sosial hanesan facebook, ida nee sei la resplve problemema.
Jornalista: Joseph Koa
Editor: Joseph Koa
