DILI, STLTIMORLESTE.com – Komandante Jerál Polisia Nasional Timor Leste (PNTL), Komisáriu Jerál Polísia Henrique da Costa triste ho hahalok ema sivil neebe hakanek membru PNTL nain tolu (3) bainhira halo atusaun iha Suku Manu-Tasi, Munisipiu Ainaro, iha tinan 2025 foin lalais nee.
“Ita hatene iha situasaun tinan foun ninian iha munisípiu balun hanesan ita nia membru polísia hetan kanek tanba ema balun tiru kilat anin, nunee Servisu Investigasaun Kriminál Nasionál halo ona prosesu, aprezenta ona ba iha Mínisteriu Públiku hodi hein kontnuasaun,” Komandante Jerál Polisia Nasional Timor Leste (PNTL), Komisáriu Jerál Polísia Henrique da Costa ba jornalista sira iha nia knaar fatin Komando Jeral PNTL, Kuarta (07/01/2026).
Nia tenik, membru PNTL mak hetan tiru no membru hirak nee ema tiru ho kilat manu.
“Membru sira neebe hetan tiru nee agora daudaun baixa hela iha Hospitál Nasionál Guido Valadares (HNGV) halao hela operasaun primeiru ba iha nia kelen, tuir informasaun hau rona katak remata ona no hein operasaun segundu mak halo operasaun ba kartus kilat manu neebe iha nia ulun. Ida nee komando entrega ba iha doutór sira atu halo,” nia deklara.
Maski nunee, Henrique fundamenta, investigasaun ba kazu nee kontnua lao no situasaun nee mosu tanba fila fali ba iha ema idak-idak nia konsénsia.
“Ida nee fila fali ba ema idak-idak, tanba prezensa polísia ninian nee atu prevene sira labele oho malu, ataka malu, labele estraga rikusoin sira seluk. Mas prezensa polísia ninian impede sira nia intensaun sira hotu entaun sira fila hodi ataka ita nian polísia sira”, nia informa.
Entretantu informasaun neebe STL hetan husi mediku balun iha HNGV katak, membru polisia nee husi Suku Manu-Tasi, Munisipiu Ainaro. Pasiente tama mai ho kondisaun grave oituan, tanba ema tiru ho kilat manu iha parte ulun, too iha emerjensia doutor sira fo atendimentu no agora baixa hela no operasi ona, hasai ona kilat musan.
Jornalista: Jeniche da Costa
