DILI, STLTIMORLESTE.com – Lei numeru 5/2022 Estatutu Majistradu Judisial, artigu 72 fo dalan atu Juiz neebe hatama karta husu rezigna aan no Konselhu desidi halo tiha demisaun, bele fila fali ba hodi konklui prosesu neebe antes nee Juiz refere kaer hanesan Juiz prosesu.
Tuir Prezidente Asosiasaun Majistradu Judisial Timor Leste, Antonino Gonsalves katak, artigu 72 Estatutu Majistradu Judisial nian hateten, iha rekezitu ida mak ezonerasaun pedidu husu atu sai husi Juiz, Konselhu simu, maibe prosesu neebe nia kaer seidauk hotu.
“Iha artigu 72 numeru 2 hateten dehan, prosesu neebe nia kaer seidauk hotu, maske konselhu desidi nia sai tiha ona, estatutu rasik hateten nia tenke fila mai hodi konklui bazeia ba prinsipiu Juiz natural,” dehan Antonino ba STL iha nia knaar fatin Kaikoli, Dili, Tersa (18/02/2025).
Nia hatutan, Juiz natural nee prosesu neebe distribui ona ba Juiz nee tenke kaer too hotu, eseptu kuandu dezastre ruma nia hetan grave, hetan tratamentu tinan barak ka nia mate ka matan aat, prosesu refere sei hasai hodi entrega fali ba iha Juiz sira seluk hodi hahu ho julgamentu foun fali.
Iha fatin ketak, Akademiku Universidade Nasional Timor Lorosae (UNTL), Rafael de Jesus dehan, ohin loron prosesu barak, maibe rekursu umanus menus, ho estatutu fo dalan Juiz nee tenke kontinua kaer fali prosesu nee.
“Se iha estatutu fo dalan Juiz nee tenke kontinua kaer prosesu neebe antes desidi tiha ona, hodi halo fali rejulgamentu,” dehan nia.
Hatutan tan, se nomeia fali Juiz foun prosesu tenke julgamentu foun, ho Juiz neebe antes nee kaer ona prosesu nee, bele iha konhesimentu ona hodi haree ba prosesu nee.
(ter)
