DILI, STLTIMORLESTE.com – Sidadaun neebe mai husi estranjeiru moris hamutuk ho sidadaun Timor, no hakarak hetan naturalizasaun hodi sai hanesan sidadaun Timor, tenke hela iha Timor durante tinan 10.
“Ida por kazamentu, ida por naturalizasaun, por kazamentu ema estanjeiru kaben ho ema Timor tinan 5 hela iha Timor, no naturalizasaun tenke tinan 10 hela iha Timor no hakarak sai sidadaun Timor tenke hatene lian ofisial rua nee, no hela iha Timor tinan 10,” dehan Diretor Rejistu Notariado, Agustinho Gonsalves Viera ba STL iha Edefisiu Notariado, Tersa (15/10/2024).
Nia hatete, hela iha Timor tinan 10, depois hatama pedidu no iha teste ba sira iha eskrita no oral ba por naturalizasaun atu sai sidadaun, sira neebe pasa mak bele hetan naturalizasaun.
Nia esplika, kona-ba por kazamentu nian hela tinan 5 iha Timor, sei teste lingua deit husi Institutu Linguistika mak sei fo ezame ba sira oral deit, se hatene tetun bele hetan ona sidadaun Timor por kazamentu nian, tuir dekretu lei numeru 9/2002, no regulamentu numeru 1/2004.
Diretor dehan, oras nee daudaun iha ema nain atus rua resin mak rejista ona atu prepara tama ba iha ezame nian. Atu hetan sertidaun por kazamentu tenke kaben tiha iha Igreja ka kaben sivil, liu tinan 5 hatama pedidu. No nia kriteria mak hatama sertidaun kazamentu, seridaun baptizmu, laen no feen nian eleitoral no pasaporte tenke hatama.
Iha fatin ketak, Komunidade Suku Komoro Domingos Mendonsa dehan, lei fo dalan atu simu sidadaun sira neebe mai husi estranjeiru hodi sai hanesan sidadaun Timor.
Lei fo dalan, tanba nee kuandu sira prienxe kriteira ona, sira bele sai sidadaun Timor, importante mak tenke liu husi regra sira neebe iha,” dehan nia.
Nia afirma, husu atu sidadaun estranjeiru hakarak sai sidadaun Timor tenke liu husi dalan legal neebe iha, tanba se la liu husi dalan nee, bele halo fali krime.
(ter)
