DILI, STLTIMORLESTE.com – Diretór Servisu Apoiu Diagnóstiku Terapéutiku iha Hospital Nasionál Guido Valadares (HNGV), Vidal de Jesus hatete, tinan oin edifísiu Pediatria no Unidade Kardiolojia Kuidadu Intensivu (ICCU) bele uza ona hodi halao tratamentu ba pasiente sira.
“Agora daudaun konstrusaun ba edifísiu foun Pediatria no ICCU nian kompletu ona por volta 40% resin, ba konstrusaun edifísiu foun ho andár lima nee, tanba daudaun nee konstrusaun sei lao hela, ita hein katak tinan ida nee nia rohan, no inisiu tinan 2026 bele entrega ona para HNGV bele uza,” hatete Vidal ba jornalista sira iha Hotel Timor, Kinta (13/03/2025).
Nia dehan, maske konstrusaun neineik ka lae, obra nee tenke lao nafatin tuir kontratu obra neebe iha.
“Karik iha kontratu hatete katak tenke entrega iha tinan oin, entaun tenke entrega. Karik hakarak estende konstrusaun, tenke hatama karta pedidu ida”, nia esplika .
Nia informa, konstrusaun edifísiu Pediatria no ICCU iha HNGV remata tuir kontratu servisu neebe iha ona.
Iha sorin seluk, Diretor Empreza China Civil Engineer Contruction Cooperation (CCECC), Liang Quing komprometidu katak sei konklui projetu ida nee ho infraestrutura neebe kualidade ba Governu no povu Timor Leste.
Entretantu Governu prevele ho montante orsamentu hamutuk milhaun US$9.3 no konstrusaun refere ho durasaun tinan 2, hahu 2023 – 2025 neebe kaer husi kompanhia CCECC.
Lansamentu ba Pediatria andar 5 no ICCU iha HNGV nee iha inísiu fulan Janeiru 2023 nian, depois konstrusaun ba pediatria andar 5 nee foin daudaun iha fulan Setembru mak halo lansamentu ba ai-riin nian neebe agora daudaun nia progresu atinji 40%.
(jen)
