DILI, STLTIMORLESTE.com – Hospital Nasional Guido Valadares (HNGV) asina akordu kona-ba entendimentu ho Banku Nasional Komersiu Timor Leste (BNCTL) hodi estalebese ba pagamentu dijital nian iha HNGV, nunee selu saida deit bele liu husi sistema dijital.
“Ohin ita asina ona ho BNCTL hodi estabelese banku ida iha HNGV, atu nunee pagamentu saida deit tenke liu husi sisitema dijital,” hatete Diretor Ezekutivu HNGV, Nuno Vital Soares ba jornalista sira iha nia knaar fatin HNGV, Sesta nee (27/06/2025).
Nia tenik, durante tinan naruk sistema dijital nee laiha,.nunee pagamentu saida deit selu liu husi manual, entaun ho ida nee mak HNGV halo koordenasaun ho BNCTL atu loke pagamentu dijital ida iha nee.
“Tinan naruk ita la iha ida nee, entaun ho tinan ida nee ita implementa nunee ita hafasil liu ba komunidade sira neebe mak hakarak halo teste, ezemplu teste ba SEFOPE nian, teste ba PNTL, VIP, laboratoriu, medical cek up, buat sira nee selu liu husi sistema dijital, nunee la bele hamosu buat ida naran mal administrsaun,” nia esplika.
Antes nee Diretór Servisu Apoiu Diagnóstiku no Terapéutiku, Vidal de Jesus Lopes informa, HNGV sei asina nota entendimentu ka MoU ho BNCTL atu estabelese banku ida iha HNGV, nunee pagamentu saida de’it mak iha tenke liu husi sistema dijital.
“Ami halo hela koordenasaun ho BNCTL atu asina MoU, tanba foin lalais sira mai ami hatudu ona fatin hodi estabelese banku ida iha nee atu bele halo pagamentu saida deit mak iha HNGV tenke selu liu husi sistema, atu selu US$ 1 dolar, atu selu US$ 8 ka US$10 nee mos sei liu husi sistema, nunee hamenus mal adminsitrasaun sira,” nia esplika.
Nia deklara, antes nee regras sira nee estabeleese dezde HNGV harii, maibe pagamentu ne’e uza manual deit, tanba nee agora tenke uza fali dijitál hodi tuir sistema.
“Regras nee iha tiha ona dezde HNGV harii, sistema pagamentu nee uluk kedas lao, maibe ita uza deit manuál, agora mak tenke dejitaliza hodi forma tuir sistema deit, nunee evita buat sira mal administrasaun sira nee,” nia afirma.
(jen)
