DILI, STLTIMORLESTE.com – Governu liu husi Hospital Nasional Guido Valadares (HNGV) entrega ona restu mortais saudozu Komandante Ponta Leste, Lino da Costa “Olocassa” ba familia sira, hodi ba halao nia funebre iha nia rezidensia Kampung Baru, Dili.
Diretor Ekzekutivu iha HNGV, Cecília Barros Mendonça dehan, saudozu Olocassa ninia restu mortais rai iha Mortoariu HNGV durante tinan ida hodi hein, tinan ida hein Forensik halo tes DNA.
“Forensik halao hela prosesu tes DNA komesa tinan ida no prosesu nee hotu ona no identifika ona, ita entrega ona ba familia matebian saudozu Olocassa nian,” hatete Cecília ba jornalista sira iha Sala Mortoariu HNGV, Kuarta (15/01/2025).
Nia hatutan, HNGV ho familia ohin halo serimonia transladasaun restu mortais Komandante Setor Ponta Leste, Saudozu Lino da Costa “Olocassa” ba familia hodi halao serimonia fúnebre.
Iha fatin hanesan, Xefe Departamentu Forensik iha HNGV, Nilton Tilman hatete, serimonia entrega restu mortais Saudozu Lino da Costa “Olocassa” ba familia, tanba teste DNA hotu ona.
Nia dehan, kona-ba teste DNA nee, tanba sasin sira neebe iha Uatulari, Saudozu Olocassa hakohi hamutuk iha rai kuak ida mak Saudozu Solan, Saudozu Serakai, depois 2009 ba kee tiha, maibe lori mai rai iha Jardin Metinaro, depois tinan 15 mak foin Xefe Estadu Maior Jeneral, FALINTIL Forsa Defeza TImor Leste (F-FDTL), Domingos Raul Falur Rate Laek ho inisiativa ida foti para atu halo teste ba Saudozu nain tolu nee.
(jen)
