DILI, STLTIMORLESTE.com – Xefe Departamentu Maternidade iha Hospitál Nasionál Guido Valadares (HNGV), Zinia Mascarinhas hatete, durante fulan Janeiru too Marsu HNGV rejista bebe mate inan nia kabun laran hamutuk 52.
“Dadus husi Janeiru too Marsu, inan neebe mak partu iha sala maternidade hamutuk 1,554, husi nee partus normál hamutuk 1,014, sesariana hamutuk 372, vacum hamutuk 131 no bebe mate iha inan nia kabun laran hamutuk 52,” hatete Xefe Zinia Mascarinhas ba jornalista sira iha nia knaar fatin HNGV, Kuarta (09/04/2025).
Nia dehan, bebe moris ho pesu normal durante fulan tolu hamutuk 1,247, bebe moris ho pezu la normál hamutuk 228, bebe neebe moris kaduak hamutuk 25 no bebe neebe moris ho mal pozisaun hamutuk 38.
“Bebe sira neebe mak moris iha maternidade HNGV durante fulan tolu, mane hamutuk 817 no feto hamutuk 737,” nia deklara.
Nia haktuir, bebe sira neebe mak mate iha inan nia kabun laran nee kauza husi inan sira mai ho infeksaun no mos inan sira durante isin rua ladun fó importansia ba halo tratamentu saude iha fasilidade saúde sira neebe besik.
Nia tenik, inan sira neebe mak hetan moras antes hanesan hipertensaun kronika, pre-eclampsia no raan midar, ida nee mos fo impaktu ba bebe mate iha inan nia kabun laran.
“Inan sira neebe mak partu iha HNGV, durante fulan tolu maioria mai husi Munisípiu Dili, tanba sira hatene katak HNGV nee hanesan top referensia, entaun sira hakarak mai partus iha nee, maske sentru saúde iha Dili laran nee iha, entaun sira mai ona nee ami labele haruka fila, maibe ami tenke halo atendimentu ba sira,” nia informa.
Nia esplika, husi fulan tolu nee inan neebe mate iha maternidade HNGV hamutuk nain 4, tanba kauza husi komplikasaun sira neebe mak sira hetan, entaun ida nee mak sira mate.
Iha fatin hanesan, Inan Maria Fatima Verdial informa, atendimentu iha sala Maternidade HNGV diak tebes, tanba ekipamentu atu atende bá inan isin rua sira mos kompletu.
“Hau kontente tebes tanba hau partus normál no agora atu alta ba uma no atendementu iha HNGV diak tebes,” nia deklara.
Entretantu husi Departamentu Obsterisia no Gynecolojia iha Mediku Espesialista nain 8 Timoroan nain 5, Cuba nain 2 no Xineza nain 1, nunee Mediku Jeral hamutuk 17 no mos parteira sira hamutuk 40 resin, inklui kama ba maternidade hamutuk 38.
(jen)
