DILI, STLTIMORLESTE.com – Hospital Nasional Guido Valadares (HNGV) rekonhese estudante estajiariu fo atendimentu ba pasiente no pasiente trauma, ho nunee pasiente hakotu iis iha HNGV, maibe HNGV sei hadia ida nee iha futuru mai.
“Ami rekonhese akontesimentu neebe akontese iha sala Serojia HNGV, ita nia maluk pasiente mane ho idade 81 neebe baixa kauza semana ida ona, atu halo intervensaun ba halo operasaun, maibe sai iha media raan sai barak, loos duni ami rekonhese hodi kalan tuku 09:00 too 11:00 ami buka tuir hodi hatene, los duni ita nia estudante estajiariu ba haree ida fatin soru nee mak bubu, neebe hasai tiha tau kapas ho tau plester ba mak raan nee sai, mai haree nia foto mos raan nee sai, laos raan nee sai husi isin nian, isin nee tomak nee, nee mak derrepente pasiente trauma no ita halo atendimentu maibe la konsege salva nia vida,” hatete Diretor Servisu Apoiu Diagnostiku no Terapeutico, Vidal de Jesus Lopes ba jornalista sira iha nia knaar fatin HNGV, Dili, Segunda (14/04/2025).
Nia dehan, inprinsipiu laiha mediku no staf sira iha intensaun aat ba kualker atendimentu, sempre servi ho domin ba pasiente hotu-hotu ho responsabilidade.
“Ami simu ona relatoriu husi mediku sira neebe tama rotasaun nee, tanba nee ita sei kria ekipa independente ida para halo investigasaun ba akontesimentu ida nee, nunee ita bele hahete informasuan nee ho loos,” nia esplika.
Nia tenik, tuir analizasaun familia no publiku katak, pasiente nia raan sai nee mak halo nia iis kotu. “Maibe HNGV halo analizasaun katak, montante husi raan nee rasik, ita haree avo nee ho idade neebe 81 no komplikadu moras diabetes no moras seluk,” nia nia deklara.
Nia infroma, atendimentu balun hanesan simples monitorin, koko tensaun, hasai soro no taka ho plester ba pasiente nia liman nee sira bele halo.
“Kala estajiariu ba taka metin ho plester nee mak la metin halo raan sai, loos duni nee ami rekonhese, tanba ami la halo monitorin, maibe ita tenke treinu sira, tanba sira jerasaun foun neebe aban bairua fo atendimentu ba ita nia pasiente,” nia deklara.
Iha fatin hanesan, Familia Matebian, Orlando Fereira husu ba HNGV labele haruka estudante sira fo atendimentu ba pasiente neebe grave, tanba hodi kalan estajiariu mak fo atendimentu ba matebian.
“Ami lakon ami nia avo , maibe ami husu nafatin ba HNGV labele fo tempu ba estajiariu hodi fo atendimentu ba pasiente neebe grave, tanba nee ami husu labele halo, tanba sidadaun sira seluk mos sei baixa iha HNGV, tanba ami konsulta iha nee hakarak saude diak, laos lori mate ba uma,” nia afirma.
(jen)
