DILI, STLTIMORLESTE.com – Iha tinan 2025, Hospital Nasional Guido Valadares (HNGV) sei Submete lista ba Ministeriu Saude (MS) atu halo rekrutamentu ba Profisional Saude hamutuk 500, hodi responde ba servisu saude iha HNGV.
“2025 ita sei submete lista ba MS atu halo rekrutamentu, tanba ita presiza Profisional Saude atu mai servisu iha nee, entaun kalkulasaun neebe ita halo sei presiza 500, tanba atu responde ba pediatria andar lima (5) no ICCU, inklui andar haat (4) neebe atu harii tan iha tinan oin,” hatete Diretora Ezekutiva Hospital Nasional Guido Valadares (HNGV), Cecilia Barros Mendonça ba jornalista sira iha HNGV, Sesta (06/12/2024).
HNGV tuir Cecili, sei presiza tan mediku espesialista, mediku jeral, pediatria no tekniku aliadu sira. “Ita nia mediku espesialista Timoroan daudaun nee hamutuk 76, entaun mediku balun ita nafatin haruka ba nasaun Cuba, Fiji, Indonezia no Xina, nunee ita prepara ita nia rekursu umanus iha futuru,” nia informa.
Nia deklara, HNGV rasik presiza nafatin rekursu umanu, tanba mediku espesialista Timoroan sei menus, entaun Governu servisu hamutuk ho nasaun Kuba, Fiji, Indonezia no Xina atu reforsa iha espesialidade nee rasik.
Iha fatin ketak, Akademista UNTL, Jose Luis Belo deklara, Governu aloka ona orsamentu ba MS tenke halo rekrutamentu Profisional Saude barak, atu nunee bele responde servisu ilha HNGV.
(jen)
