DILI, STLTIMORLESTE.com – Daudaun nee Hospital Nasional Guido Valadares (HNGV) halo transferensia pasiente ba Hospital Antônio Carvalho Lahane, tanba espasu la sufisiente no numeru pasiente aumeta barak.
Diretor Servisu Apoiu Diagnóstiku no Terapeutiku iha HNGV, Vidal de Jesus Lopes dehan, semana hira ikus nee HNGV enfrenta duni over load pasiente ka pasiente demais, tanba nee HNGV uza hotu kama neebe iha, maibe espasu laiha ona, tanba nee HNGV transferensia pasiente ba Hospital Antônio Carvalho Lahane.
“Ita mos utiliza espasu hotu iha HNGV, maibe la sufisiente nafatin, ho nunee numeru kama neebe iha 450 ita utiliza hotu ona, tanba nee ita uza fali Emerjensia Pediatria foun nee mos utiliza hotu ona, ami mos halo ona karta ba MS no fo ona despaisu katak, ami bele utiliza Hospital Antônio Carvalho Lahane, tanba nee dezde horiseik no hodi kalan ami transferensia pasiente 30 ba iha neeba,” hatete Vidal ba jornalista sira, iha nia knaar fatin HNGV, Bidau, Dili, Tersa (07/1/2024).
Nia esplika, Hospital Antônio Carvalho Lahane neebe iha kondisaun ho espasu neebe sufisiente, tanba nee Konselhu Diretiva foti desizaun hodi halao transferensia pasiente ba Hospital Antônio Carvalho Lahane.
Nunee pasiente neebe mai HNGV nee moras komun, pasiente barak nee laos kona surtu ruma, maibe pasiente sira mai tohar, iis boot, labarik sira dengue, struk, tanba Hospital referal no Sentru Saude sira kontinua halo transfensia mai HNGV.
Iha fatin hanesan, Família Pasiente Juliana Evas Guterres informa, komesa horiseik no hodi kalan HNGV halo transferensia pasiente ba Hospital Antônio Carvalho Lahane, tanba espasu iha HNGV la sufisente.
(jen)
