BAUCAU, STLTIMORLESTE.com – Hospital Rejional Eduardo Ximenes (HoREX) Baukau laiha Banco de Sangue hodi rai raan, tanba nee Governu liu husi Ministeriu Saude (MS) atu harii fatin ba Banco de Sangue hodi familia pasiente no ema halo doasaun raan bele rai iha fatin refere hodi fo atendimentu ba pasiente nomos inan isin rua sira.
“Ita iha HoREX Baukau laiha Banco de Sangue para atu tau raan,” hatete Diretor Ezekutivu HoREX Baukau, Claudino Ximenes ba jornalista sira iha HoREX Baukau, Kinta (21/11/2024).
Maibe nia iha tekniku sira iha HoREX Baukau sufisiente hodi hasai raan no fatin Banco de Sangue mak laiha atu rai raan.
Agora daudaun HoREX iha ona planu halo ona dezenhu hodi aprezenta ba Ministeriu Saude (MS) hodi koloka orsamentu para harii fatin Banco de Sangue ida iha Baukau.
Bainhira pasiente nia familia presiza raan A, depois hospital ho familia pasiente esforsu hodi buka raan, atu nunee fo pasiente neebe persiza raan, tanba nee impaktu hodi labele salva lalais ema nia vida.
Iha fatin hanesan, Familia Pasiente Luis do Carmo husi Munisipiu Lautem informa, HoREX Baukau nia atendimentu diak, maibe raan atu fo ba pasiente mak susar tebes, tanba fatin Banco de Sangue iha HoREX Baukau laiha.
No nia husu ba Governu liu husi Ministeriu Saude tenke harii uma ba Banco de Sangue, nunee pasiente neebe persiza raan hein foti hodi uza ba pasiente neebe persiza.
Entretantu Pasiente Teresa António Marcal ho tinan 41 koalia, atendimentu iha HoREX lao diak tebes, maibe Ministeriu Saude tenke harii Banco de Sangue para hodi rai raan sira neebe familia pasiente hasai no doadores sira hasai hodi tulun pasiente liu-liu inan isin rua sira.
(jen)
