BAUKAU, STLTIMORLESTE.com – Hospital Rejional Eduardo Ximenes (HoREX) Baukau liu husi seguransa hospital la fo oportunidade ba labarik idade menus 15 akompanha familia vizita pasiente, tanba antisipa moras atu hadaet.
Informasaun nee hatoo husi Diretor Ezekutivu HoREX Baukau, Claudino Ximenes ba STL iha knaar fatin HoREX, Kuarta (28/05/2025).
“Ita iha regra ba labarik 15 anos mai kraik nee labele mai iha hospital iha sa oras deit, tanba sira nia imunidade seidauk forsa adapta situasaun, hospital nee ema moras nian, se sira nia imunidade diak sira la moras, maibe sei imunidade la diak sira sei moras,” hateten Claudino.
Dirijente HoREX nee katak, durante nee HoREX estabelese regras bandu labarik idade menus tinan 15 atu akompanha familia sira vizita familia pasiente neebe halo tratamentu iha sala baixa sira, tanba hospital fatin akumula komunidade husi moras oin-oin.
Maibe familia sira vizita familia pasiente kotinua akompanha ho labarik vizita pasiente, nee sinal la diak, tanba dala barak labarik sira akompanha familia ba hospital hatudu jeitu nakar toba tun iha ajulezu leten hodi kaer tun ajulezu leten, nee sinal la diak, tanba azuleju iha bakteria oin-oin posibilidade afeta la diak ba labarik, bainhira kaer azuleju kaer tan hahan hodi han.
Nia argumentu, atu evita labarik sira nia saude mak durante nee parte HoREX taka avizu iha portaun tama no sai inklui iha kama pasiente idak-idak, aleinde mos liu husi seguransa la fo oportunidade ba labarik sira tama ba hospital, maibe kontinua akontese labarik akompanha familia vizita pasiente, tanba aproveita oras vizita fo razaun ema hein labarik iha uma laiha.
“Ami nia seguransa dala barak fo hatene sira la halo tuir, ita hanoin bandu sira nee buat la diak, maibe agora lori labarik mai, sira neebe baixa alta loron ida rua, la kleur labarik sira mai fila fali, tanba sira mai hasoru loos moras,” Claudino Ximenes argumentu.
Dirijenti HoREX nee katak, atu evita labarik sira akompanha familia vizita pasiente, konsiensia ema idak-idak nian, maibe hospital liu husi seguransa kontinua bandu, tanba kestaun labarik imunidade seidauk forsa atu hasoru ambiente hospital.
(tom)
